Qostanaıda sharýa qojalyǵynyń kúzetshisi kisi óltirgen qylmyskerdi qolǵa túsirdi
QOSTANAI. QazAqparat - Qostanaı aýdany polıtsııa bóliminiń qyzmetkerleri sharýa qojalyǵynyń kúzetshisimen birigip kisi óltirý qylmysyn ashty, dep habarlaıdy QazAqparat.
Oqıǵa 11 shildede Aqsaı aýylynda bolǵan. 31 jastaǵy er adam aradaǵy janjaldan soń 32 jastaǵy týysyn pyshaqtap tastaǵan. Aýyr dene jaraqaty saldarynan jábirlenýshi oqıǵa ornynda kóz jumdy. Er adamnyń mert bolǵanyn polıtsııaǵa onyń jubaıy jetkizdi. Kúdikti oqıǵa ornynan qashyp ketken.
«Qylmystyq is bolǵan jerge aýdan prokýrory Rınat Kárimov bastaǵan jedel-tergeý toby kelip jetti. Jedel-izdestirý qyzmetiniń bastyǵy Serik Raqyshev pen ýchaskelik polıtsııa ınspektory Batyr Ysqaqov kúdiktiniń Zarechnyı kentine qaraı qashyp ketkeni týraly aqparat aldy. Olarǵa kúdikti jaıly málimetti «Sadovod» sharýa qojalyǵynyń kúzetshisi Evgenıı Radıýk aıtqan», - delingen oblystyq polıtsııa departamenti taratqan habarlamada.
Sharýa qojalyǵynyń kúzetshisi polıtseıler kelgenshe kúdiktini ustap turǵan. Osylaısha, Evgenıı Radıýk aýyr qylmystyq istiń «izin sýytpaı» ashýǵa múmkindik jasady.
Qazir bul fakt boıynsha sot aldy tergeý sharalary bastaldy.
