Qostanaıda sharap ónimin zańsyz satpaq bolǵan kásipker sottaldy
QOSTANAI. QazAqparat – Oblystyq Ekonomıkalyq tergeý departamenti qyzmetkerleri alkogol ónimin zańsyz satpaq bolǵan qostanaılyqtyń jolyn kesti, dep habarlaıdy QazAqparat.
Tergeý barysynda anyqtalǵandaı, Qostanaı qalasynyń turǵyny Shymkent qalasynyń azamatynan alkogol ónimi men jáne jalǵan esepke alý-baqylaý markalaryn satyp alǵan. Sodan keıin zańsyz satyp alǵan ónimin «Apıs» JShS tsehyna kelip, «Apıs» alkogol óniminiń zattańbalary japsyrylǵan shyny ydystarǵa quıǵan.
«Zańsyz ónim jasaýǵa plastıkalyq tyǵyndylar, alıýmınıı burandaly qaqpaqtar men termoqondyrǵysh qalpaqshalardy paıdalanǵan. Sodan keıin Shymkentten ákelgen jalǵan esepke alý-baqylaý markalaryn japsyrǵan. Marka «QR Ulttyq Bankiniń Banknot fabrıkasy» ShJQ RMK talaptaryna sáıkes kelmeıdi. Alkogol ónimin ózine tıesili dúkender jelisinen bólshek saýda arqyly aınalymǵa engizgen»,- delingen oblystyq Ekonomıkalyq tergeý departamentiniń aqparatynda.
Qostanaı qalasy № 2 sotynyń úkimimen Qostanaı qalasynyń turǵyny QR QK 233-baby 2 bóligi boıynsha qylmystyq quqyq buzýshylyq jasady dep tanyldy. Sot otyrysynda sottalýshy kinásin tolyq moıyndady.
Sot ony alkogol ónimderin bólshek saýda arqyly ótkizý quqyǵynan aıyrdy, kásipkerge toǵyz aı merzimge probatsııalyq baqylaý belgileı otyryp, bas bostandyǵyn shekteý túrindegi jaza taǵaıyndady.
Іs boıynsha zattaı dáleldemeler:1749 shólmek alkogol ónimi, 17797 dana jalǵan esepke alý-baqylaý markasy joıylady.
