Qostanaıda shahmat alańy ashyldy

Ýfımtsev atyndaǵy shahmat klýbynda shahmattan oblystyń ashyq chempıonaty bastaldy. Dástúrli týrnır bıyl Qostanaı oblysy ákimi Arhımed Muhambetovtiń júldesi úshin ótti. Oblystyń barlyq aýdan-qalasynan 50-ge taıaý sportshy keldi.

Arhımed Muhambetov oblys ákimdigi ǵımaratynyń janyndaǵy shahmat alańynyń ashylýyna qatysty.

«Oblys shahmatshylary respýblıkalyq jarystarda jaqsy nátıje kórsetip júr. Ony osyndaı aýqymdy týrnırlerge qatysyp júrgen sportshylarymyz rastaıdy. Mysaly, Tımýr Nurjanov 20 jasqa deıingi jastar arasynda el chempıony atandy. Ol Azııanyń eń úzdik 5 shahmatshysynyń qataryna endi. QR chempıonatynda júldeger atanǵan Alramı Aldabergenovtiń de jetistikterine qýanamyz. Petr Kostenkony barlyǵyńyz bilesizder. Tamyz aıynda ol Azııa chempıonatyna qatysyp keldi. Bizdiń mindetimiz - shahmat sportyna kelgenderge barynsha jaqsy jaǵdaı jasaý. Qazirdiń ózinde oblys turǵyndarynyń otyz paıyzy buqaralyq sportpen shuǵyldanady. Osy qarqyndy báseńdetpeý qajet», - dedi óńir basshysy shahmat alańynyń ashylý saltanatynda.
 

Uıymdastyrýshylardyń sózinshe, qatysýshylar jas aralyqtary boıynsha topqa bólindi. 1955 jyly týǵan sportshylardan bastap ardagerler tobynda oınaıdy. Barlyǵy 11 týr ótedi. Ár týr 3 mınýt 2 sekýndtan turady. Júlde qory - 500 myń teńge.

Aıta keteıik, 2018 jyldyń jeltoqsan aıynda Astanada QR ashyq chempıonaty ótedi. Atalǵan jarysta Shyńǵyshan Sarjanov pen Petr Kostenko oblys namysyn qorǵaıdy.