Qostanaıda shaǵyn jáne orta bıznesti qoldaýǵa 6 mlrd teńge bólindi

QOSTANAI. QazAqparat - Qostanaı oblysynda 2019 jyldyń alǵashqy toqsanynyń ózinde shaǵyn jáne orta bıznestiń 80 jobasyn qarjylandyrýǵa 6 mlrd teńge qarastyrylyp otyr. Bul týraly oblys ákimdiginde ótken apparat májilisinde belgili boldy, dep habarlaıdy QazAqparat.

Óńirde shaǵyn jáne orta kásipkerlikti damytýǵa aıtarlyqtaı kóńil bólinip keledi. Máselen, ótken jyldyń toǵyz aıynda 353,9 mlrd teńgeniń ónimi óndirilgen. Bul jalpy ishki ónimniń 24% -ine teń. Oblystyq kásipkerlikti damytý basqarmasy basshysynyń mindetin atqarýshy Roza Gorıannaıanyń aıtýynsha, 2018 jyly 51 093 shaǵyn jáne orta kásipkerlik nysany tirkelgen.

«Ásirese, oblys ortalyǵynan shalǵaı ornalasqan Denısov, Amankeldi, Jankeldın aýdandarynda bul jumystar qarqyn alǵan. Kerisinshe, Qamysty aýdany men Rýdnyıda kásipkerlik alǵa basar emes. Bul aýdandarda shaǵyn jáne orta kásipkerlikpen aınalysý isi mardymsyz. Osydan baryp ónim óndirý kólemi tómendeıdi. Sondyqtan, aýdan, qala ákimderi mundaı keleńsizdiktiń aldyn alý úshin naqty jospar túzýleri tıis. Bul baǵytta memleket tıisti kómek berip keledi. Osyny tıimdi paıdalanǵan jón»,-dedi Roza Gorıannaıa.

Jalpy, oblysta «Eńbek» nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasynyń» ekinshi baǵyty sheńberinde shaǵyn jáne orta bıznes sýbektilerin mıkrokredıtteýge 2,1 mlrd teńge qarastyrylǵan bolatyn. «Prezıdenttiń bes áleýmettik bastamasy» sheńberinde qosymsha taǵy 1 mlrd teńge bólindi. Qarajat tolyǵymen ıgerildi, bul rette 933 kásipker shaǵyn nesıe alyp, kásibin dóńgeletýde.

«Ótken jyly «Bıznestiń jol kartasy-2020» baǵdarlamasynyń sheńberinde oblysqa 2 mlrd 759 mln teńgeden astam qarjy bólindi. Osy arqyly kásipkerlerdiń 200-ge jýyq jobasyna qoldaý kórsetildi. Bul baǵdarlamalardyń ekonomıkalyq áleýeti zor. 2019 jyldyń alǵashqy toqsanynyń ózinde shaǵyn jáne orta bıznestiń 80 jobasyn qarjylandyrýǵa 6 mlrd teńge qarastyrylyp otyr», - dedi ol.

2016 jyldan bastap oblysta kásipkerlerdi óńirlik qarjylandyrýdyń «Qos Qoldaý» baǵdarlamasy jumys isteýde. Atalǵan baǵdarlama boıynsha eki jyl ishinde 1329 mln teńgeniń 53 kredıti berildi, onyń ishinde 2018 jyly qaıta ınvestıtsııalanǵan qarajat esebinen somasy 181 mln teńgeniń 7 jobasy maquldandy.

Jıyndy qorytyndylaǵan oblys ákimi Arhımed Muhambetov aýdan jáne qala basshylaryna óńirlerde shaǵyn jáne orta kásipkerlikti damytýda naqty jumystar júrgizý qajettigin qadap tapsyrdy.