Qostanaıda saılaý protsesi joǵary deńgeıde uıymdastyrylǵan – halyqaralyq baıqaýshy

QOSTANAI.QazAqparat – Qostanaı oblysynyń Óńirlik kommýnıkatsııalar qyzmetinde saılaýdy baqylaý nátıjelerine arnalǵan brıfıng ótti. Oǵan Chelıabi oblysynyń saılaý komıssııasynyń tóraǵasy Sergeı Obertas jáne Chelıabi oblysynyń ishki saıasat basqarmasynyń bólim basshysy Alekseı Ilınyh qatysty, dep habarlaıdy QazAqparat tilshisi.

Halyqaralyq baıqaýshylar Qostanaı oblysynyń úsh qalasyndaǵy saılaý ýchaskelerine bardy. Sapar maqsaty – parlamenttik saılaý protsesin baǵalaý jáne tekserý. Reseılik meımandar astyqty aımaqta saılaý protsesi joǵary deńgeıde uıymdastyrylǵanyn atap ótti.

«Bul rette qostanaılyqtardan úırenerimiz bar. Ásirese saılaýshylar tizimin qurǵan kezde tehnıkalyq múmkindikter jaqsy paıdalanylǵan. Sondaı-aq bıýlletenderdi berý jýrnalyn toltyrý úshin trafaretti qoldanǵan. Bul da tıimdi ádis. Jalpy saılaý protsesi kezinde turǵyndarǵa qysym kórsetilgen joq. Halyq emin-erkin júrip-turdy», - deıdi Alekseı Ilınyh.

Reseılikter barlyq saılaý ýchaskelerinde qolaıly sanıtarlyq jaǵdaılar jasalǵanyna toqtaldy.

«Biz saılaýshy bolmasaq ta, ýchaskelerdiń kireberisinde bakterııaǵa qarsy kilemshe turdy, termometrııa protsedýrasynan ótip, qolymyzdy zararsyzdandyrdyq. Bizge de, daýys berýshilerge de qorǵanys quraldary bar jeke paket berildi», - deıdi Sergeı Obertas.

Baıqaýshylardyń aıtýynsha, saılaý komıssııasynyń músheleri iskerlik turǵydan jaqsy daıyndalǵan. Aýa raıynyń qolaısyzdyǵy, qardyń mol túsýi saılaýshylarǵa kedergi bolǵan joq. Kommýnaldyq qyzmetter ýaqtyly tazalyq jumystaryn júrgizip otyrdy.