Qostanaıda sarqyndy sýdy jınaıtyn toǵannyń 80 paıyzy tolǵan
ASTANA. KAZINFORM- Qostanaı mańynda ornalasqan sarqyndy sý jınaqtaǵyshy jobalyq syıymdylyǵynyń shamamen 80 paıyzyna tolǵan.
«Qostanaı-Sý» kásipornynyń málimetinshe, qalanyń turmystyq sarqyndy sýlary Qostanaıdan 14 shaqyrym jerdegi Samır kenti mańynda ornalasqan jınaqtaǵysh-toǵanǵa jiberiledi. Nysannyń jobalyq syıymdylyǵy – 115 mln tekshe metr. Qazirgi ýaqytta onyń shamamen 80 paıyzy tolǵan.
Osy derekterge súıensek, jınaqtaǵyshta shamamen 92 mln tekshe metr sarqyndy sý bar. Al bos qalǵan kólemi 23 mln tekshe metrge jýyq.
Kásiporynnyń káriz jelileriniń jalpy uzyndyǵy – 561,1 shaqyrym. Olardyń tozý deńgeıi 61,56 paıyzǵa jetken. Sarqyndy sýdy tasymaldaý úshin qalada 33 sorǵy stantsııasy jumys isteıdi. Bas káriz-sorǵy stantsııasynyń jobalyq qýaty táýligine 125,7 myń tekshe metr bolsa, naqty kórsetkishi táýligine 45–50 myń tekshe metrdi quraıdy.
2026 jyly kásiporyn káriz jelilerin jańartý jobalaryn júzege asyrýmen aınalysty. Bıýdjet qarajaty esebinen jalpy uzyndyǵy 15,2 shaqyrym bolatyn eki joba qarastyrylǵan. Budan bólek, ınvestıtsııalyq baǵdarlama aıasynda uzyndyǵy 3,4 shaqyrymdy quraıtyn taǵy alty joba iske asyrylyp jatyr.
Kásiporyn ekologııalyq tehnologııalarǵa da erekshe nazar aýdaryp otyr. Úsh jyldyq joba aıasynda munda Chlorella mıkrobaldyrlaryn paıdalana otyryp, sarqyndy sýdy bıologııalyq tazartý ádisi engizilgen. Kásiporynnyń málimetinshe, hlorella qosylǵannan keıin júrgizilgen zerthanalyq taldaý lastaýshy zattar mólsheriniń azaıyp, erigen ottegi deńgeıiniń artqanyn kórsetken.
Buǵan deıin eldegi káriz jelileriniń jartysynan astamy tozǵany týraly jazdyq.