Qostanaıda sapasyz qyzmet kórsetken jylý kompanııasy 2,9 mln teńge aıyppul tóleıdi

QOSTANAI. QazAqparat - Jospardan tys tekserý nátıjesi negizinde «Qostanaı jylýenergetıka kompanııasy» MKK ákimshilik jaýapkershilikke tartyldy, dep habarlaıdy QazAqparat Tabıǵı monopolııalardy retteý komıtetine silteme jasap.

Komıtettiń Qostanaı oblysy boıynsha departamenti oblys ortalyǵy turǵyndarynyń ujymdyq ótinishi negizinde jospardan tys tekserý júrgizdi. Onyń nátıjesinde «Qostanaı jylýenergetıka kompanııasy» MKK jylýmen jabdyqtaý qyzmetin sapaly kórsetý talaptaryn saqtamaǵany anyqtaldy.

«Elektr stansasy men jelilerin tehnıkalyq paıdalaný erejelerine sáıkes, jylý jelisine kelip túsetin sý temperatýrasynyń ±3%-ke deıin aýytqýyna jol beriledi. Alaıda, kásiporynnyń jylý energııasyn berý aýytqýy 10%-ke deıin jetken. Bul páterdegi aýa temperatýrasynyń tómendeýine jáne ystyq sýmen jabdyqtaý júıesindegi temperatýranyń jetkiliksizdigine ákeldi. Osyǵan baılanysty tabıǵı monopolııa sýbektisine qatysty Ákimshilik quqyq buzý kodeksiniń 164-baby 4-bóligi boıynsha ákimshilik is qozǵaldy» dep habarlaıdy komıtet.

Ákimshilik is Qostanaı qalasynyń mamandandyrylǵan ákimshilik sotyn berildi. Sot «Qostanaı jylýenergetıka kompanııasyna» 2 969 120 teńge kóleminde aıyppul saldy.