Qostanaıda sanıtarlyq talapqa saı kelmeıtin taǵamdar satylǵan
QOSTANAI. QazAqparat - Qostanaı oblysynda jergilikti taýar óndirýshiler shyǵarǵan tamaq ónimderiniń sapasy nasharlaǵan. Bul týraly agenttik tilshisine oblystyq qoǵamdyq densaýlyq saqtaý departamenti taǵam ónimderin sanıtarııalyq-gıgıenalyq qadaǵalaý bóliminiń basshysy Natalıa Gatsenbeller málim etti.
Jalpy, oblysta mıkrobıologııalyq kórsetkishterge sáıkes kelmegen ónimderdiń úles salmaǵy 6,6%-ǵa teń. Máselen, oblystaǵy sút óndirý kásiporyndarynda bul kórsetkish 7,0%-dy qurady.
«Bakterııalyq lastanǵan ónimderdi sanıtarııalyq dárigerler jyl ishinde «DEP» JShS, «Mılh» JShS, «Lıder-2010» JShS, «Sadchıkovskoe» seriktestikterinde anyqtaldy. Al jartylaı fabrıkattar tsehtarynda et ónimderiniń 11%-y talapqa saı kelmeıdi. Atap aıtqanda, «Qarasý Et» JShS, «Oktan fırmasy» JShS, «Darýs-2001» JShS, «Berezka-Agro» sharýa qojalyqtary tıisti mindettemelerin buzǵan», - deıdi Natalıa Gatsenbeller.
Sapasyz ónimder Qostanaıdaǵy krem-kondıterlik tsehtarynda da jıi kezdesedi. Mamandar qazirdiń ózinde 7 kondıterlik tsehta densaýlyqqa zııan keltiretin ónimderdiń baryn anyqtady.
«Ásirese, tort jáne tátti toqashta ishek taıaqshasy toptarynyń bakterııalary bolǵan. Keıbir toqash-nandardyń kógergeni, kondıterlik suıyq ónimderdiń ashyp ketken jaǵdaılary tirkeldi. Sonymen qatar, jyl ishinde, «Gevorgıan G.V», «Sergııchýk V.P», «Hekoıan V.M», «Karagýlına L.A» sııaqty óndirýshilerdiń talapqa saı emes krem-kondıterlik buıymdaryn satqany týraly shaǵymdar kelip tústi. Tipti, olarda taǵamnyń óndirilgen kúni japsyrylmaǵan», - dedi bólim basshysy.
Sanıtarlyq dárigerler tamaqtaný oryndarynda óndiriletin daıyn astyń jáne aspazdyq ónimderdiń sapasynyń nasharlaǵanyn aıtyp dabyl qaǵady. Tamaqtaný oryndarynda qaýipsiz mıkrobıologııalyq kórsetkishterge sáıkes emes ónimderdiń úles salmaǵy 12,4%-ǵa jetken. Sapasyz ónimderdiń deni Qostanaı, Lısakov, Rýdnyı qalalaryndaǵy iri dámhana men meıramhanalarynda satylǵan.
Byltyr tamaq satatyn obektilerdi tekserý nátıjesi boıynsha kásiporyn ıelerine 322 aıyppul salyndy. Olar el qazynasyna 8,3 mln teńge qarajat aýdarady.
