Qostanaıda salyq organynyń qyzmetkeri bıznes quqyqtaryn buzǵany úshin jaýapqa tartyldy
QOSTANAI. KAZINFORM - Qostanaı qalasynyń prokýratýrasy salyq zańnamasynyń saqtalýyn taldaý barysynda kásipkerlik sýbektisiniń quqyqtarynyń buzylýyn anyqtady.
Qostanaı qalalyq prokýratýrasy baspasóz qyzmetiniń habarlaýynsha, salyq organynyń buıryǵy negizinde qala kásipkerleriniń birine qatysty hronometrajdyq zertteý júrgizilgeni anyqtaldy.
Tekserý barysynda fıskaldyq organnyń laýazymdy tulǵalary tekserý obektileriniń kireberisterin kún saıyn mórlep otyrdy.
Alaıda, mundaı áreketter memlekettik kiris organdarynyń hronometrajdyq zertteý júrgizý tártibin retteıtin Qazaqstan Respýblıkasynyń qoldanystaǵy zańnamasynda kózdelmegen.
Salyq organynyń bólim basshysy bolǵan jaǵdaı týraly habardar etilgenine qaramastan, bıznes sýbektisiniń quqyqtarynyń buzylýyna jol bermeý sharalary qabyldanǵan joq.
Osyǵan baılanysty, qala prokýratýrasy laýazymdy tulǵanyń áreketsizdigi úshin ákimshilik is qozǵady, ol QR Ákimshilik quqyq buzýshylyq týraly kodeksiniń 173-babyna sáıkes saralandy.
Materıaldar sotqa joldandy.
- Qaraý qorytyndysy boıynsha sot qadaǵalaý organynyń ýájderimen kelisip, laýazymdy tulǵany kináli dep tanyp, 100 AEK kóleminde aıyppul túrindegi ákimshilik jaza taǵaıyndady, - delingen habarlamada.
Qostanaı qalasynyń prokýratýrasy kásipkerlerdiń quqyqtaryn qorǵaý jáne memlekettik organdardyń zańsyz aralasýynyń aldyn alý boıynsha júıeli jumysty jalǵastyrady.
Osyǵan deıin Qostanaıda prokýratýra bilim qyzmetkerleriniń 5 mln teńge qosymsha tólem alýyna yqpal etkeni týraly jazdyq.
