Qostanaıda sábılerge bólingen 5,3 mln teńgeni qaltasyna basqan esepshi sottaldy
QOSTANAI. QazAqparat - Qostanaı qalasynda memleket aqshasyn jymqyrdy dep kúdikke ilingen sábıler úıiniń bas esepshisine qatysty sot úkimi shyqty, dep habarlaıdy QazAqparat oblystyq sottyń baspasóz qyzmetine silteme jasap.
Qostanaı qalalyq №2 sotynda «Delfın» Qostanaı sábıler úı» QMK bas esepshisine qatysty qylmystyq is qaraldy. Іs derekterinde kórsetilgendeı, 2016 jylǵy 1 qańtar - 2017 jylǵy 31 jeltoqsan aralyǵynda atalmysh sábıler úıiniń bas esepshisi Jamasheva 5 372 200 teńge qarajatty jymqyrǵan. Bul asa iri kólemdegi qarjy sanalady.
«Sot úkimimen Jamasheva QR QK 189-baby, 3-tarmaǵy boıynsha kináli dep tanyldy. Oǵan 2 jyl 6 aı merzimge bas bostandyǵynan aıyrý jazasy taǵaıyndaldy. Ol jazasyn qaýipsizdigi tómen túzetý mekemesinde óteıdi», - delingen oblystyq sottyń baspasóz habarlamasynda.
Sot Jamashevany materıaldyq jaýapkershilikke baılanysty laýazymdardy atqarý quqyǵynan 5 jyl merzimge shektedi.
