Qostanaıda sábıdiń shetineýine baılanysty qylmystyq is qozǵaldy

ASTANA. KAZINFORM — Polıtsııa ókilderi patsıenttiń qaıtys bolýyna baılanysty qylmystyq is qozǵalǵanyn málimdedi, dep jazady Kazinform tilshisi.

Kazinform agenttigi osy oqıǵaǵa baılanysty Qostanaı oblystyq Polıtsııa departamentine resmı saýal joldady. Vedomstvo aldyn ala derekke sáıkes medıtsınalyq qyzmetkerdiń óz kásibı mindetterin tıisinshe oryndamaýy saldarynan abaısyzda adamnyń qaıtys bolýyna baılanysty is qozǵalǵanyn túsindirdi.

Qazirgi tańda oqıǵanyń barlyq mán-jaıyn anyqtaýǵa baǵyttalǵan tergeý áreketteri júrgizilip jatyr.

Eske salaıyq, 2025 jylǵy naýryz aıynda Qostanaıdaǵy perınataldyq ortalyqta sábı anasynyń qursaǵynda shetinep ketken edi. Onyń anasy oqıǵa saldarynan reprodýktıvtik múshesinen aıyrylǵan.

Týystary bul jaǵdaıǵa medıtsına qyzmetkerleriniń salǵyrttyǵy sebep boldy dep esepteıdi.

Buǵan deıin Qostanaı oblysynda náreste ólimi úshin bas dárigerlerge sógis jarııalanǵanyn jazdyq.