Qostanaıda ruqsat etilmegen aýmaqta sýǵa túskenderge aıyppul salynady
Qostanaı qalasynyń sý aıdyndarynda qaıǵyly jaǵdaılarǵa jol bermeý úshin jergilikti atqarýshy organdar jyl saıyn sýdaǵy tótenshe jaǵdaılardy azaıtý jáne aldyn alý sharalaryn júrgizedi.
«Qalalyq TJ basqarmasy ókilderimen birlesip, Tobyl ózeniniń boıynda zańsyz uıymdastyrylǵan shomylý oryndarynda 10 dana eskertý taqtaıshasyn ornatyldy. Jazǵy mezgilde mundaı taqtaıshalar «KJBI» kópiri mańynda, Gashek boıyndaǵy jaǵalaýda, bulaq mańynda, Gagarın bógeti, «Káris» kópiri, «Aq Shańyraq» demalys orny, KSK aýdanyna da qoıyldy. Qala turǵyndary men qonaqtaryn, sýǵa arnaıy belgilengen oryndarda shomylýǵa jáne qaýipsizdik erejelerin saqtaýǵa shaqyramyz», - delingen Qostanaı qalasy ákimdigi taratqan habarlamada.
Sonymen qatar, QR Ákimshilik quqyq buzýshylyq týraly Kodeksiniń 364 babyna sáıkes, sý paıdalaný qaǵıdalaryn buzǵandarǵa eskertý jasalady. Ákimdik qyzmetkerleri eskertý sharasynan soń qaıtadan zań buzý eki aılyq eseptik kórsetkish mólsherinde aıyppul salýǵa ákep soǵatynyn eskertedi.
«Shomylý maýsymynda barlyq shomylý oryndaryn barynsha qamtı otyryp, bilim mekemeleri pedagogtarynyń kezekshiligi uıymdastyrylady. 2 qutqarý jáne bir medıtsınalyq beket qurylady», - dep atap ótti qalalyq ákimdik ókilderi.
Jalpy, Qostanaı qalasynda úsh resmı jaǵajaı jumys isteıdi. Olar - «Mohıto», «Aq shańyraq» demalys aımaǵy jáne qalalyq jaǵajaı. Al ruqsat etilmegen jerlerde sýǵa shomylǵandarǵa aıyppul salynady.