Qostanaıda robot tehnıkasy festıvali ótip jatyr
QOSTANAI. QazAqparat - Qostanaı qalasynda robot tehnıkasy jáne avtomatıka boıynsha festıval bastaldy, dep habarlaıdy QazAqparat.
Atalmysh festıval osymen úshinshi jyl qatarynan uıymdastyryldy. Bul jolǵy jarys «Rýhanı jańǵyrý» baǵdarlamasynyń «Tárbıe jáne bilim» kishi baǵdarlamasy aıasynda ótýde. Aldymen, oqýshylar men kolledj, JOO stýdentteri sporttyq robot tehnıkasy boıynsha synǵa tústi. Olar ózderiniń ǵylymı jumystaryn bes baǵyt boıynsha usynýda. Olar: ken óndirý, óńdeý ónerkásibi, jaryq jáne jylý energetıkasy, kólik jáne logıstıka, aýyl sharýashylyǵy, sondaı-aq, «aqyldy» qalalar. Qostanaı polıtehnıkalyq kolledjdiń 3-kýrs stýdenti Nıkıta Pýshnenkonyń aıtýynsha, mundaı jarystar óńirdegi robot tehnıkasynyń damýyna túrtki bolady.
«Men «Aqyldy saıajaı» dep atalatyn ǵylymı jumysymdy ákeldim. Munda men saıajaıdy adam kómeginsiz, avtomatty túrde basqarýǵa bolatynyn kórsetkim keldi. Men nobaıyn jasaǵan saıajaı arnaıy datchıkter arqyly alystan basqarylady. Arnaıy qurylǵy arqyly saıajaıdyń ishki temperatýrasy eseptelip shyǵarylady», - deıdi festıvalǵa qatysýshy Nıkıta Pýshnenko.
M.Dýlatov atyndaǵy ınjenerlik-ekonomıkalyq ýnıversıtetiniń oqytýshysy Vladımır Madın aıtqandaı, robot tehnıkasy jáne avtomatıka festıvaline 100-den astam oqýshy men stýdent qatysýda.
«Stýdentter buǵan deıin tehnıkalyq jáne kásiptik bilim berý uıymdarynyń arasynda ótken «WorldSkills Kazakhstan 2018» baıqaýyna qatysty. Saıys 15 nomınatsııa boıynsha ótti. Robot tehnıkasynyń sheberleri óz jumystarynda «Dánekerleý tehnologııasy», «Shashtaraz óneri», «Keskindeme jáne sándik jumystar», «Júk mashınasyna qyzmet kórsetý», «Jeńil avtokólikke qyzmet kórsetý, jóndeý» jáne «Medıtsınalyq jáne áleýmettik kútim» sııaqty salalardy qamtydy. Baıqaýǵa qalamyzdyń barlyq kolledjderinen 113 stýdent qatysqan. 14 qatysýshy qola júldeni ıelense, kúmis júldeni - 15, al altyn júldeni 16 oqýshy jeńip aldy», - dedi V.Madın. 
Aıta ketý kerek, jaqynda M.Dýlatov atyndaǵy ınjenerlik-ekonomıkalyq ýnıversıtet bazasynda tsıfrly akademııa quryldy. Munda «Avtomatıka jáne robototehnıka» sabaǵy oqytylady.
