Qostanaıda RF azamaty 11 jasar qyzdy tunshyqtyryp óltirgen
QOSTANAI. QazAqparat - Qostanaı oblysynyń týmasy, búginde RF azamaty ózimen birge turatyn áıeldiń 11 jasar qyzyn óltirgeni úshin aıyptalýda, dep habarlaıdy QazAqparat oblystyq sottyń baspasóz qyzmetine silteme jasap.
Іs derekterinde kórsetilgendeı, aıyptalýshy 2016 jyly jubaıy men balasyn Reseıde tastap, ata-anasymen turý úshin óziniń týǵan jeri - Qostanaı oblysynyń Qarasý aýdanyna keledi. 2017 jyldyń tamyz aıyna deıin ol jergilikti uıymdardyń birine dánekerleýshi bolyp ornalasqan. Sodan keıin kólikti tehnıkalyq qaraý stansasyna (TQS) avtoelektrshi qyzmetin atqaryp júredi. Ol TQS-na jumysqa turǵan soń sol jerde burynǵy tanys áıelimen kezdesedi.
«Kúdikti 2018 jyldyń 20 mamyrynda burynǵy tanysynyń úıine kelip, ishimdik ishken. Kelesi kúni úı ıesi birneshe kúnge Qostanaı qalasyna ketip, 2007 jyly týǵan balasy men úıin qadaǵalaýdy kúdiktige tapsyrady. 21 mamyr kúni túnde aıyptalýshy mas kúıinde óziniń jynystyq qushtarlyǵyn qanaǵattandyrý maqsatynda tanysynyń qyzy uıyqtap jatqan bólmege baǵyt alǵan. Bul kezde qyz kereýette uıyqtap jatty. Kámeletke tolmaǵan qyz kúdiktiniń qoly denesine tıgen oıanyp ketti», - delingen oblystyq sottyń habarlamasynda.
Osy túnde kúdikti qyzdy tunshyqtyryp óltirip tastaǵan. Máıitti Vostok selosynan bir shaqyrym qashyqtyqta dalaǵa tastap ketken. Tergeýshilerdi jańylystyrý maqsatynda qyzdyń aıaq kıiminiń bir syńaryn aýyl ishine ákelgen.
Osylaısha, Qarasý aýdanynyń týmasy, búginde RF azamaty QR QK 99-baby, 2-bóligi, 3, 14-tarmaqtary boıynsha sot aldynda jaýap beredi.
