Qostanaıda respýblıkalyq án baıqaýy márege jetti
QOSTANAI. QazAqparat - Qostanaıda kompozıtor Qalıbek Deripsaldın ánderin oryndaýshylardyń respýblıkalyq «Kóktem-qyzdar» atty án baıqaýynyń gala-kontserti aıaqtaldy, dep habarlaıdy QazAqparat tilshisi.
Respýblıkalyq án baıqaýy E.Ómirzaqov atyndaǵy oblystyq fılarmonııada ótti. Oǵan Batys Qazaqstan, Jambyl, Almaty, Aqmola, Aqtóbe jáne Qostanaı oblystarynan 20 ónerpaz qatysty. Quramynda Ermurat Úsenov, Beıbit Dáldenbaı, Ǵazıza Jumekenova, Nazymbek Moldahmetov sııaqty mýzyka mamandary bar ádilqazylar alqasy ánshilerdiń ónerin eki kún boıy saralady.
Sonymen, baıqaýdyń úshinshi oryny Gúlbaqyt Jańbyrbaeva (Qostanaı), Azamat Muqatov (Qostanaı), Álim Ámirǵazınderge (Aqmola) buıyrdy. Al ekinshi orynnyń júldesin aqtóbelik Nurtas Omarov pen qostanaılyq Qanat Rajanov bólisti. Batys Qazaqstan oblysynan kelgen Dárııa Baqytova men Dastan Esentemirov birinshi orynǵa ıe bolsa, baıqaýdyń bas júldesi tarazdyq Janatbek Qadyrovqa tapsyryldy.
Osy keshte Qostanaı oblysy ákimi apparatynyń basshysy Arman Ábenov Qalıbek Deripsaldınge oblys ákiminiń quttyqtaý hatyn tapsyrdy. Sondaı-aq, sazgerge Amangeldi aýdanynyń ákimi Nurjan Ótegenov pen Shyraqbek Qabylbaev atyndaǵy Qostanaı Akademııasynyń bastyǵy Mırlan Qyzylov syı-syıapat jasady. Munan soń baıqaý jeńimpazdary jergilikti kompozıtorlardyń ánderin oryndady.
«Men ómirimniń 45 jylyn án ónerine arnadym. Oǵan qosa bıyl 65 jasqa tolamyn. Osynaý aıryqsha datany jurt sııaqty shyǵarmashylyq kesh berip atap ótýge bolar edi, biraq halyqtyń esinde qalatyndaı erekshe dúnıe jasaǵym keldi. Sodan respýblıkalyq án baıqaýyn ótkizýdi qolǵa aldyq. Jalpy, osy jyldyń aıaǵynda Astanada jeke kontsertimdi bergim keledi. Buǵan Tobyl-Torǵaı topyraǵynyń ónerpazdaryn ertip aparamyn. Oǵan Qostanaı oblystyq mádenıet basqarmasy kómektesemiz dep ýáde etip otyr. Buryn Astana, Almaty, Qaraǵandy, Kókshetaý, Petropavl, Oral, Atyraý, Shymkent, Taraz qalalarynda jeke kontsertimdi berdim. Taǵy bir jańalyq, júzden astam ánim toptastyrylǵan «Tobyl-Torǵaı áýenderi» atty ekinshi án jınaǵym jaryqqa shyqty», - dedi sazger agenttik tilshisine bergen suhbatta.
Aıta keteıik, Qalıbek Deripsaldın QR ІІM Shyraqbek Qabylbaev atyndaǵy Qostanaı Akademııasynyń tárbıe jumysy bóliminde qyzmet atqarady. Ol - Qostanaı oblysy, Amankeldi aýdanynyń Qurmetti azamaty, ánshi-sazger. Kompozıtordyń jetekshiligimen akademııa qabyrǵasynda 20 kýrsanttan quralǵan dombyrashylar ansambli, 200 kýrsanttan turatyn «Shyraqbek ata» hory jumys isteıdi.
