Qostanaıda respýblıkalyq alaman báıge ótedi
QOSTANAI. QazAqparat - Qostanaıda Naýryz meıramynyń mádenı, oıyn-saýyq baǵdarlamasy ázirlendi, dep habarlaıdy QazAqparat qalalyq ákimdiktiń baspasóz qyzmetine silteme jasap.
Bıyl qostanaılyqtar Ulystyń uly kúnin 21, 22 jáne 23 naýryzda atap ótedi. Aldymen, qala turǵyndary men qonaqtary at sporty merekesiniń kýási bolady.
21 naýryzda Zarechnyı aýylyndaǵy «Arǵymaq» atshabarynda 3 shaqyrymdyq toq báıge bastalady. Munan soń 7 shaqyrymǵa sozylatyn alaman báıge josparlanǵan. Aıta keteıik, báıgege Qostanaı oblysymen qatar, eldiń basqa da óńirlerinen júırikter qatysady. At sporty merekesiniń baǵdarlamasyna aýdaryspaq, qoı kóterý sııaqty qazaqtyń ulttyq oıyndary enedi. Osy kúnniń sharalary ári qaraı arqan tartý saıysymen jalǵasady.
22 naýryz kúngi baǵdarlama qalanyń ortalyq alańyndaǵy «Shaqyrady Naýryz!» sahnalyq qoıylymymen bastalady. Sondaı-aq, merekelik kontsert keshi ótedi. Onda oblysqa tanymal ánshiler óner kórsetedi.
Ortalyqta kıiz úıler tigilip, qazaqtyń salt-dástúrlerimen tanysamyn degen qala turǵyndary men qonaqtarǵa óz eshigin ashady. Aspazshylar baýyrsaq pen palaý daıyndaý boıynsha jarysqa túsedi.
23 naýryzda «Mıras» mádenıet saraıynda «Paı, paı, qazaqtyń kelinderi-aı!» atty kelinder saıysy uıymdastyrylmaq. Saıys sharty boıynsha kelinder salt-dástúrlerdi jatqa bilýi tıis. Buǵan qosa qatysýshylardyń ulttyq taǵamdar jasaý sheberligi synalady.
Aıta keteıik, meıram kúnderi qalanyń saýda ortalyqtary lotereıa oıyndaryn ótkizedi. Qalalyq ákimdiktiń baspasóz qyzmeti habarlaǵandaı, merekelik is-sharalar kestesi bekitilgen jospar qosymsha jarııalanatyn bolady.
