Qostanaıda reseılik traktorlar qurastyrylady
QOSTANAI. QazAqparat - Bıyl Qostanaıda Indýstrııalandyrý kartasy boıynsha 8 joba iriktelip alyndy. Bul týraly oblys ákimdiginde ótken jıynda málim etildi, dep habarlaıdy QazAqparat.
Qostanaı oblysy ákimdiginiń kásipkerlik jáne ındýstrııalyq-ınnovatsııalyq damý basqarmasynyń basshysy Isa Qudabekovtiń aıtýynsha, Indýstrııalandyrý kartasy boıynsha ınvestıtsııalardyń jalpy somasy 131,5 mlrd teńgege jetip, 88 joba paıdalanýǵa berilgen. Osy arqyly 5,2 myń turǵyn turaqty jumyspen qamtylyp, qazirdiń ózinde 505 mlrd teńgeniń ónimi óndirilýde.
«Biz ár qala-aýdannyń usynystaryna saraptama júrgizdik. Sonyń nátıjesinde, Indýstrııalandyrý kartasy boıynsha segiz joba irikteldi. Onyń altaýy 2018 jylǵa josparlanǵan. Buǵan qosa 2012 jyly iske qosylǵan «Maslozavod Kostanaıa» JShS óz jumysyn toqtatty. Toqyraýdyń sebebi retinde kásiporyndaǵy álsiz menedjment qarastyrylýda. Sonymen qatar, Qarabalyq aýdanyndaǵy «Komsomol qus fabrıkasy» AQ 2013 jyldan beri toqtap tur. Óıtkeni, bul zaýytta aınalymǵa keletin qarjy joq», - dedi Isa Qudabekov.
Sonymen, oblystyń óndiristik ahýalyn jaqsartý úshin ashylǵan nysandardyń eń áleýettisi -ındýstrııalyq aımaq. Onyń ishine birneshe kásiporyn qurylysy qyzý júrip jatyr. Máselen, «Ýral LTD» JShS úlken suranys bolǵan jaǵdaıda «Kırovets» traktorynyń 500-ge deıingi danasyn shyǵarýǵa nıetti. Seriktestik dırektory Valentın Romanov reseılik traktorlardy qurastyrý jospary týraly aıtty. Arhımed Muhambetov te onyń josparyn quptap, ınvestorlar tarapynan 1 mlrd teńge bólingen jaǵdaıda jer ýchaskesi beriletinin jetkizgen bolatyn.
Indýstrııalyq aımaqtaǵy «VEK Qazaqstan» JShS jedelsaty shyǵaratyn zaýyt qurylysyn qolǵa alady. Bul zaýyttyń qurylysy osy jyldyń qyrkúıek aıynda bastalǵan edi. Jobanyń jalpy quny - 2,5 mlrd teńge. Kásiporyn jylyna 1,5 myń jedelsaty jasap shyǵarýǵa qaýqarly. 125 turaqty jumys orny ashylady dep kútilýde.
