Qostanaıda «QOSTANAI TECH» otbasylyq ǵylymı-ınnovatsııalyq festıvali ótedi
QOSTANAI.KAZINFORM - 29 sáýirde saǵat 9.00-dan bastap Qostanaı qalasynda jyldyń eń aýqymdy is-sharasy bastalady. «QOSTANAI TECH» otbasylyq ǵylymı-ınnovatsııalyq festıvali qostanaılyq turǵyndar men eldiń barlyq óńirinen kelgen qonaqtardy biriktiredi. Bul festıval Memleket basshysy Qasym-Jomart Toqaev jarııalaǵan Tsıfrlandyrý jáne jasandy ıntellekt jylynyń basty oqıǵalarynyń biri bolmaq.
Festıval baǵdarlamasyn Qostanaı oblysynyń ákimi Qumar Aqsaqalov ashady.
Qonaqtar aldynda TED-formatynda sóz sóıleıtin festıvaldiń hedlaınerleri qatarynda iri óndiristiń, ІT-kompanııalardyń, qoǵamdyq pikir kóshbasshylarynyń ókilderi bar. Olardyń arasynda «KIA QAZAQSTAN» bas dırektory De Kı Kım, Freedom Cloud kompanııasynyń CEO-sy jáne QR Prezıdenti janyndaǵy JI-di damytý jónindegi keńestiń jumys tobynyń keńesshisi Temirlan Zınalabdın, Allur kompanııalar tobynyń avtokólik óndirisi salasynyń basshylyǵy, tehnologııa jáne bilim berý salasyndaǵy kásipker, Oksfordta bilim alǵan alǵashqy qazaqstandyq Ǵabıt Bekahmetov jáne taǵy basqalar bar.
«Jastar saraıynyń» kútý zalynda qonaqtardy festıval maskoty - Q-AI transformery qarsy alady jáne zamanaýı tehnologııalar kórmesi uıymdastyrylady.
Ekinshi qabattaǵy ınteraktıvti aımaqta ınnovatsııalyq protsester kórsetiledi: aqyldy óndiris 5.0, avtonomdy júıe jáne tehnologııalardyń birlesken áreketi, qalanyń tsıfrly ınfraqurylymy jáne ýrbanıstıka, XR-oqý men ımmersıvti mamandyqtar, bolashaq ekologııasy, logıstıka, tsıfrly álemdegi qaýipsizdik týraly máseleler jáne taǵy basqa.
Festıval tek tehnologııalar merekesi ǵana emes, sonymen birge eksperıment alańy bolmaq. Ekinshi qabatta balalar men jasóspirimder úshin bolashaq tehnologııalar keńistigi uıymdastyrylady. Munda mını-týrnırler ótkiziletin kıbersport arenasy, tehnopolıgon, konstrýktorlyq zerthana jáne robototehnıka aımaǵy qurylady. Jas býyn úshin VR/AI aımaǵy erekshe qyzyǵýshylyq týdyrady, munda sımýlıatsııalar zerthanasy aýyl sharýashylyǵy tehnıkasyn basqarýdan bastap elektr kólikterin qurastyrý jumysyna deıingi naqty óndiristik protsesterdiń ishinde bolýǵa múmkindik beredi.
Kóshe alańynda balalar men olardyń ata-analaryna sheberlerdiń sabaqtary, hımııa men fızıka boıynsha eksperımentter men ǵylymı shoýlar, suıyq azottyń múmkindikteri men Tesla shoýy uıymdastyrylady.
Sondaı-aq aýmaqta uıymdastyrylatyn kórmede óńirdegi jetekshi óndirýshilerdiń tehnıkasy kórsetiledi.
Avtokólik óndirisi protsesin jáne óńirdegi iri ónerkásip kásiporyndarynyń jumysyn óz kózderimen kórgisi keletinder úshin kúni boıy ındýstrııalyq ekskýrsııalar uıymdastyrylady, bul ekskýrsııalar qala turǵyndary men qonaqtary úshin turaqty bolmaq.
Festıvaldiń mańyzdy mindetteriniń biri bul otbasy qundylyqtaryn, urpaqtar jalǵastyǵyn jáne eńbek pen bilimge degen qurmetti kúsheıte otyryp, jańa býyndy mashına jasaý men agroónerkásip keshenderiniń damýynyń irgetasyna aınalyp otyrǵan baǵdarlamalaý men jasandy ıntellekt júıesin zerdeleýge shabyttandyrý.
Festıval qonaqtary úshin mazmundy baǵdarlama josparlanǵan:
• Tehnologııalar men JI salasyndaǵy jetekshi spıkerlerdiń sóz sóıleýi
• Jobalar men tehnologııalardy kórsetý
• Interaktıvti alańdar men eksperıment aımaǵynyń jumysy
• Óńir kásiporyndarynyń kórmesi
• Áserli kontsert baǵdarlamasy
• Kóptegen qosymsha is-sharalar men syılyqtar
Árkim óz talǵamyna saı is tabady. Qonaqtarǵa qolaıly bolý úshin aýmaqta tamaqtaný aımaǵy jumys isteıdi.
Festıval saǵat 19:00-de qazaqstandyq estrada juldyzy Bayansulu qatysatyn kontserttik baǵdarlamamen aıaqtalady.
