Qostanaıda psıhıkalyq syrqat adam polıtseıge pyshaq suǵyp aldy
QOSTANAI. QazAqparat - Qostanaı oblysynyń Meńdiqara aýdanynda psıhıkalyq aýytqýy bar er adam polıtseıge baǵynbaı, oǵan pyshaq saldy, dep habarlaıdy QazAqparat tilshisi.
Oqıǵa 16 qyrkúıek kúni Harkov aýylynda bolǵan. Osy kúni aýdandyq ishki ister bólimine Harkov aýylynyń turǵyny qońyraý shalyp, aǵasyn oblystyq psıhıatrıalyq aýrýhanasyna jetkizýin suraıdy.
«Syrqatty aparýǵa Meńdiqara aýdany polıtsııa qyzmetiniń ýcheskelik ınspektory Ýálıhan Júsipov jiberildi. Júsipov patsıenttiń úıine kirgen soń, kelgen sebebin túsindiredi. Oblystyq psıhıatrıalyq aýrýhanasyna barǵysy kelmegen er adam kónbeı, ýcheskelik ınspektordyń ishine pyshaq suǵyp aldy» - delingen oblystyq prokýratýranyń habarlamasynda.
Jaraqat alǵan polıtseı Harkov aýylynan aýdandyq aýrýhanaǵa jetkizildi.
«Polıtseı aýyr halde tústi. Onyń arterııasy, ót qaby jáne baýyry zaqymdanǵan. Aýdandyq aýrýhanaǵa jetkenshe 4 lıtrden astam qan joǵaltqan. 4 saǵat ota jasadyq. Qazir jaǵdaıy birqalypty», - dedi Meńdiqara aýdandyq aýrýhanasynyń bas dárigeri Marına Gızbreht.
Saraptama qorytyndysyna sáıkes, pyshaq suqqan er adam shızofrenııa aýrýyna shaldyqqan. Qazir ol psıhıkalyq emdeý ortalyǵyna aýystyryldy.
