Qostanaıda psıhıatrııalyq aýrýhana qyzmetkeriniń ólimine qatysty sot otyrysy ótti
QOSTANAI. QazAqparat - Oblystyq psıhıatrııalyq aýrýhananyń burynǵy bas dárigeri, sot-psıhıatrııalyq saraptaý ortalyǵynyń tóraıymy Rashıda Sandybaevaǵa qastandyq jasady degen kúdikti psıhıatr dáriger Záýresh Izaldınaǵa qatysty sot isiniń birinshi otyrysy ótti, dep habarlaıdy QazAqparat tilshisi.
Oblystyq psıhıatrııalyq aýrýhananyń bólim meńgerýshisi qyzmetin atqaryp júrgen Záýresh Izaldına men dıspanserdiń burynǵy patsıenti Rýslan Gafarov kinásin moıyndamady. Bolat Kıtebaev qylmys jasaǵanyn, alaıda tapsyryspen kisi óltirmegenin aıtty. Al Vıktor Kodatenko aıyppen tolyqtaı kelisti.
Eske salsaq, ústimizdegi jyldyń 17 aqpan kúni Rashıda Sandybaeva men Zaýresh Izaldına sózge kelip qalǵan, oǵan biraz adam kýá bolǵan. Izaldına - psıhıatrııalyq aýrýhananyń erler bóliminiń meńgerýshisi, bir kezderi bas dárigerdiń orynbasary bolǵan. Keıin jumysynan kemshilik anyqtalyp, laýazymynan tómendetilgen. Al Rashıda Sandybaeva ekeýiniń arasynda óshpendilik ornaǵanyna biraz ýaqyt bolǵan. 20 aqpan kúni eki bólmeli páterinde oblystyq psıhıatrııalyq saraptaý bóliminiń burynǵy bas dárigeri Rashıda Sandybaeva asqan qanisherlikpen óltirildi. Resmı málimet boıynsha, onyń denesinen 30-dan asa pyshaq izi tabylǵan.
Qostanaılyq psıhıatr-dáriger Rashıda Sandybaevany óltirdi dep aıyptalǵan dáriger psıhdıspanserdiń bas dárigerin de óltirýge tapsyrys bergen. Sot tyńdaýynda osylaı dep málimdeldi. Izaldınanyń burynǵy áriptesi, dáriger Svetlana Romanova kúdiktiniń qyzmet barysynda birneshe ret dórekilik tanytqanyn kórgen.
Kodatenko 1 268 000 teńge materıaldyq jáne 5 000 000 teńge moraldyq shyǵyn óteıdi. Kıtebaev tek materıaldyq shyǵyn óteýge kelisti. Gafarov pen Izaldına shyǵyn qunyn tóleýden bas tartty.
Aıyptaý aktisine sáıkes, Izaldına, Gafarov, Kodatenko, Kıtebaev «Іri kólemdegi alaıaqtyq», «Turǵyn úıge zańsyz kirip, aldyn ala sóz baılasý arqyly asa iri kólemde urlyq jasaýdy uıymdastyrý», «Aldyn ala sóz baılasý arqyly tulǵalar tobymen eki jáne odan da kóp adamdy óltirýdi uıymdastyrý», «Aldyn ala sóz baılasý arqyly kisi ólimin uıymdastyrý» sekildi birneshe aýyr baptar boıynsha aıyptalyp otyr. Uıymdasqan topty urlyq jasaýǵa Záýresh Izaldına ıtermelep otyrǵan. Tipti, ol jaqyn tanystarynyń dúnıe-múlkin, qomaqty qarajatyn tonaýǵa nusqaý bergen.
Psıhıatrııalyq aýrýhananyń kólik júrgizýshisi Pavel Kalashnıkov burynǵy áriptesterdiń arasynda áldebir kıkiljińniń oryn alǵanyn baıqamaǵan.
Rashıda Sandybaevanyń óli denesin birinshi kólik júrgizýshisi kórgen.
Endigi sot otyrysynda kýágerlerden jaýap alynady.
