Qostanaıda prokýratýranyń aralasýymen bıýdjetke 616 mln teńge qaıtaryldy
ASTANA. KAZINFORM – Salyq zańnamasynyń saqtalýyn qamtamasyz etý jáne memlekettiń ekonomıkalyq múddelerin qorǵaý maqsatynda oblys prokýratýrasy salyq salý salasyndaǵy zańdylyqtyń jaı-kúıine turaqty túrde taldaý júrgizip keledi.
- 2025 jyly qabyldanǵan prokýrorlyq den qoıý sharalarynyń nátıjesinde bıýdjetke 616 mln teńge tústi.
Mysaly, salyq tóleýshilerdiń biri deklaratsııalarda anyq emes málimetterdi kórsetken. Bul bıýdjetke 267,9 mln teńge kóleminde salyqtyń túspeýine ákelgen.
Anyqtalǵan buzýshylyq boıynsha prokýratýra ýákiletti organǵa qadaǵalaý aktisin engizdi. Qaraý nátıjesinde joǵaryda kórsetilgen soma tolyq kólemde óndirildi, - delingen aqparatta.
Salyq salý salasyndaǵy zańdylyqty qamtamasyz etý jónindegi jumys jalǵastyrylady.
Aıta keteıik, buǵan deıin salyq bereshegin óndirý tártibi jeńildegeni habarlanǵan bolatyn.
