Qostanaıda prezıdenttik kópsaıystan QR ІІM chempıonaty bastaldy
QOSTANAI. QazAqparat - Qostanaıda Astana kúni merekesine oraılastyrylǵan prezıdenttik kópsaıystan QR ІІM chempıonaty bastaldy, dep habarlaıdy QazAqparat.
Qazaqstan chempıonatyna eldiń ár oblysynan 100-den astam tártip saqshysy keldi. Olar sporttyń 6 túrinen ózara myqtyny anyqtaıdy. Jarystyń ashylý saltanatynda sóz sóılegen oblystyq ІІD bastyǵy, polıtsııa general-maıory Beket Aımaǵambetovtiń aıtýynsha, prezıdenttik kópsaıys ár qyzmetkerdiń dene daıyndyǵy men kásibıligin anyqtaıtyn sport túri.
«Óńirde buqaralyq sportqa basa nazar aýdarylǵan. Jyl saıyn túrli deńgeıde spartakıadalar ótkizilip turady. Bul jolǵy jarys Astana kúni merekesine saı keldi. Dástúrli túrde ótetin prezıdenttik kópsaıys chempıonaty tártip saqshylarynyń shydamdylyǵyn, jeńiske degen jigerin kórsetedi», - dedi Beket Aımaǵambetov.
Chempıonattyń birinshi kúni polıtseıler sýǵa júzýden saıysqa tústi. Olar 50 jáne 100 metrge túrli ádispen júzdi. Osy kúni myltyq atý saıysynyń alǵashqy aınalymynyń jeńimpazdary anyqtaldy.
Bıylǵy chempıonatty jaqsy kórsetkishtermen bastaǵan Aqtóbe oblysy arnaıy kúzet qyzmeti basqarmasynyń qyzmetkeri Temirhan Kemalov jarystyń fınaldyq kezeńine shyǵýǵa úmitti.
«Men byltyr myltyq atýdan 3-oryn aldym. Jaman kórsetkish emes. Biraq, bıyl nátıjemdi jaqsartyp, fınalǵa shyǵýdan úmitim bar. Myltyq atý kez kelgen tártip saqshysynyń kásibı daıyndyǵyn kórsetedi. Sol sebepti, jumys ýaqytynda oq atý zalyna únemi baryp turamyn», - dedi jarysqa qatysýshy.
Aıta keteıik, prezıdenttik kópsaıystan QR ІІM chempıonaty aldaǵy aptada túıindeledi.
