Qostanaıda prezıdent saılaýyna qatysty sarapshylar otyrysy ótti
Jıynǵa oblystyń ǵylym salasy qyzmetkerleri men qoǵam belsendileri shaqyrtyldy. Ýnıversıtet rektory Alma Doşanovanyń sózinshe, aldaǵy prezıdent saılaýy mańyzdy ári ýaqtyly sheshim.
«Bul el tarıhyndaǵy mańyzdy qadamdardyń biri bolatyny sózsiz. Sondyqtan saılaýǵa deıin túsindirme jumystarynyń saýatty júrgizilgeni durys. Buǵan úkimettik emes uıymdardyń qosatyn úles joǵary. Ǵylym salasyndaǵy tájirıbeleri bar ǵalymdar da turǵyndardyń saýaldaryna júıeli jaýap bergen jón. Nasıhat jumystaryna naǵyz sheber mamandar tartylady. Sarapshy pikiri sol úshin de kerek. Bizdiń de jınalyp otyrǵanymyzdyń sebebi osy», - deıdi rektor.
Al professor Álimjan Bekmaǵambetov azamattyq qoǵam ınstıtýtynyń belsendileri saıası turǵyda saýatty dep esepteıdi.
«Elbasy negizin qalap ketken strategııalyq kýrsty damytý osy azamattyq qoǵam belsendileriniń qolynda. Túrli formattaǵy basqosýlardy ótkizý úshin úkimettik emes uıymdardyń tájirıbesi kerek ekeni ras. Solardyń biri - túsindirme jumystary. 9 maýsym kúni el ómirinde mańyzdy oqıǵa bolatyny belgili. Qoǵam belsendilerin osynaý dataly oqıǵa kezinde tasada qalyp qoımaýlaryn suraımyz. Menińshe, Qostanaı óńiri saılaý naýqanyna belsendi qatysyp, azamattyq ustanymyn bildiredi», - deıdi Á.Bekmaǵambetov.
Jıynda belsendi jastar arasynda sarapshylardy iriktep, túsindirme jumystaryna qatystyrý máselesi kóterildi. Olardyń arasynda jastar máslıhatynyń depýtattary, kásipkerler men belsendi stýdentter bar.
