Qostanaıda polıtsııaǵa jarylǵysh zat týraly jalǵan habarlama tústi

ASTANA. KAZINFORM — Qostanaıda saýda ortalyǵynda jarylǵysh qurylǵy týraly jalǵan habar taratqan jasóspirim anyqtaldy, dep habarlaıdy Polisia.kz.

Qostanaı qalasyndaǵy saýda ortalyqtarynyń birinde jarylǵysh zat qoıyldy degen aqparat boıynsha shuǵyl tekseris júrgizildi. Habarlama jalǵan bolyp shyqty.

Alaıda jedel-izdestirý is-sharalary nátıjesinde quqyq qorǵaý organdary jalǵan aqparat taratqan tulǵany anyqtady.

Qostanaı oblystyq polıtsııa departamentiniń ekstremızmge qarsy is-qımyl basqarmasynyń qyzmetkerleri telefon qońyraýyn jasaǵan adamnyń jeke basyn zerdelep, ol qala mektepteriniń birinde oqıtyn kámeletke tolmaǵan jasóspirim ekenin bildi.

Jasóspirim zańdy ókiliniń qatysýymen bul áreketti buzaqylyq nıetpen jasaǵanyn moıyndady.

Onyń aıtýynsha, mundaı árekettiń saldary týraly bilmegen. Oqıǵa ornyna dereý jetken arnaıy qyzmet ókilderi ǵımarat pen onyń aýmaǵyn muqııat tekserip, eshqandaı jarylǵysh zat tappady. Soǵan qaramastan, mundaı áreket el arasynda dúrbeleń týdyryp, tótenshe qyzmetterdiń jumysyn qıyndatty.

Qazirgi ýaqytta balaǵa qatysty ata-anasynyń, mektep psıhology men áleýmettik pedagogtyń qatysýymen profılaktıkalyq jáne tergeý sharalary júrgizilip jatyr.

Sonymen qatar balanyń anasy kámeletke tolmaǵandy tárbıeleý mindetterin tıisti deńgeıde oryndamaǵany úshin ákimshilik jaýapqa tartyldy.

Polıtsııa terrorızm aktisi týraly kórineý jalǵan habarlama – aýyr qylmystyq quqyq buzýshylyq ekenin eskertedi. Mundaı áreketter, tipti kámeletke tolmaǵandar tarapynan jasalsa da, zań aıasynda qatań jazalanady.