Qostanaıda polıtsııa qyzmetkerine qol kótergen aýyl turǵyndary sottaldy

QOSTANAI. KAZINFORM — Qostanaı oblysynyń eki turǵyny ýchaskelik polıtsııa qyzmetkerin balaǵattap, kúsh qoldanǵany úshin sottaldy. Sot olarǵa bas bostandyǵyn shekteý jazasyn taǵaıyndady jáne sot zalynda bosatty.

Anyqtalǵandaı, 2025 jyly 18 maýsym kúni keshki ýaqytta Qostanaı oblysy Uzynkól aýdany Presnogorkovka aýylynda kámeletke tolmaǵan balany alyp ketý úshin dámhanaǵa mas kúıinde eki er adam kelgen. Olardyń arasynda janjal týyndap, sol arada bir adam óziniń ógeı ulyn soqqyǵa jyqqan.

Oqıǵa ornyna jedel jetken polıtsııa qyzmetkeri tártipsizdikti toqtatýǵa tyrysqan. Biraq er adamdar ashýǵa býlyǵyp, ádepsiz sózder aıtyp, polıtsııa qyzmetkerine fızıkalyq kúsh qoldanyp, qarsylyq tanytty. Saldarynan ınspektor dene jaraqatyn alyp, onyń qyzmettik kıimi de búlingen.

Sotta memlekettik aıyptaýshy ár sottalýshyny 6 jylǵa bas bostandyǵynan aıyrýdy surady. Aıyptalýshylardyń biri kinásin ishinara moıyndap, jábirlenýshiden keshirim surasa, ekinshisi aıybyn moıyndamady. Jábirlenýshi tarap aıyptaýshy taraptyń ustanymyn qoldady.

Sot eki aıyptalýshynyń da kishkentaı balalarynyń bolýyn, ókinishterin jáne jaǵymdy minezdemelerin eskerdi. Nátıjesinde aýyl turǵyndarynyń birine 5 jyl bas bostandyǵyn shekteý, al aldyńǵy úkimdi eskere otyryp — 5 jyl 3 aı bas bostandyǵyn shekteý túrindegi jaza taǵaıyndaldy.

Ekinshisi bes jylǵa shartty túrde sottaldy.

Úkim jarııalanǵan soń eki aıyptalýshy da sot zalynda bosatyldy. Úkim zańdy kúshine engen joq.

Buǵan deıin Astana qalasynda polıtsııa qyzmetkerin qorqytqan turǵynǵa qatysty úkim shyqty. Al Abaı oblysynda polıtsııa qyzmetkerin qorlaǵan adam jaýapqa tartyldy.