Qostanaıda polıtseıler kámeletke tolmaǵan eki dropperdi anyqtady

ASTANA. KAZINFORM — Qostanaıda polıtsııa qyzmetkerleri alaıaqtyq áreketke qatysy bar eki kámeletke tolmaǵan jasóspirimdi anyqtady.

Polisia.kz-tiń málimetinshe oqıǵa telefon qońyraýynan bastalǵan.

Beıtanys adamdar jergilikti turǵynǵa onyń kelini jaıaý júrginshini qaǵyp ketti dep habarlap, máseleni sheshý úshin 7 mıllıon teńge talap etken. Alaıda jábirlenýshiniń qolynda tek 2 myń dollar bolǵan. Qatty úreılengen áıel aqshany belgilengen adamǵa tabystaǵan. Keıin týysymen sóıleskennen keıin ǵana onyń eshqandaı jol apatyna qatysy joq ekenin bilgen.

Jedel-izdestirý sharalary barysynda polıtseıler 17 jastaǵy eki jasóspirimdi ustady. Olar aqshany basqa valıýtaǵa aıyrbastap, ózge shottarǵa aýdaryp úlgergen.

Sondaı-aq sol kúni dál osyndaı shema boıynsha taǵy 1 mıllıon teńge jymqyrylǵany anyqtaldy, biraq bul jaǵdaıda jábirlenýshi áli tabylǵan joq.

Tergeý barysynda alaıaqtardyń Telegram arqyly «jumys» usynǵany belgili boldy. Qazir sotqa deıingi tergeý júrgizilip jatyr, kúdiktilerdiń basqa da osyndaı qylmystarǵa qatysy bar-joǵy tekserilip jatyr.