Qostanaıda polıtsııa volonterleri jumys isteı bastady
Qostanaı oblysy polıtsııa departamenti baspasóz qyzmetiniń bas mamany Kenje Qonysbaıdyń sózinshe, eriktiler kóshelerdi patrýldeý, joǵalǵan adamdardy izdeý, sondaı-aq profılaktıkalyq jumystardy júrgizý kezinde polıtseılerge kómektesedi. Búgin jas kómekshilerge Qostanaı qalasy polıtsııa basqarmasynyń «Naberejnyı» beketinde arnaıy keýdesheler men «Polıtsııa volonteri» kýálikteri tapsyryldy.
«Bul kýáliktiń bir artyqshylyǵy – keleshekte jumysqa ornalasýǵa oń septigin tıgizedi. Jalpy, polıtsııa departamentinde 500-den astam adam erikti túrde kómek kórsetýde. Jyl basynan beri olar 12 qylmys pen 400 ákimshilik quqyq buzý faktilerin anyqtady. Qoǵamdyq tártipti saqtaýǵa belsene qatysqany úshin 110 polıtsııa kómekshisi marapattaldy», - dep atap ótti jergilikti polıtsııa qyzmetiniń bastyǵy Qurmet Májikenov.
Polıtsııa eriktisi Saltanat Aımurzına kýáligin alǵandardyń arasynda. Ol eki jyl boıy «DOS» izdestirý jasaǵynyń quramynda belsendi jumys istep keledi.
«Men muny azamattyq paryzym dep sanaımyn. Bizdiń top joǵalǵan adamdardy izdeý boıynsha is-sharalardy belsendi júrgizedi, sondaı-aq muqtajdarǵa kómektesedi. «Polıtsııa volonteri» ataǵy odan ári jumysqa ornalasýǵa múmkindik beredi, óıtkeni biz osy mamandyqtyń qyr-syryn qazirdiń ózinde meńgerip úlgerdik», - deıdi Saltanat Aımurzına.
Polıtsııa volonterleri qalanyń ortalyq bóligin qamtıtyn «Naberejnyı» tirek pýnktinde óz jumysyn bastaıdy.
Eske salsaq, eriktiler qozǵalysynyń mańyzy jaıynda Memleket basshysy Qasym-Jomart Toqaev erekshe atap ótken bolatyn. Osy jyl elimizde eriktiler jyly bolyp jarııalanǵany málim.