Qostanaıda polıtsııa kóligimen bolǵan jol apatynyń vıdeosy jarııalandy
QOSTANAI.QazAqparat – Qostanaı oblysynyń polıtsııa departamenti qyzmettik kóliktiń qatysýymen bolǵan jol-kólik oqıǵasynyń vıdeosyn jarııalady, dep habarlaıdy QazAqparat.
Keshe Qostanaı oblysynda polıtsııanyń patrýl avtokóligi «VAZ 2115» markaly kólikpen soqtyǵysqan bolatyn. 4 jasar bala oqıǵa ornynda qaza tapty.
«Qazir jol apaty boıynsha qyzmettik tekserý júrip jatyr. Patrýl kóligi jol ústinde dabyl belgisin qosyp júrgen. Polıtsııa jol apaty bolǵan jerde ornalasqan «Aragvı» dámhanasynyń beınebaqylaý kamerasy arqyly oqıǵany zerttep jatyr», - deıdi oblystyq polıtsııa departamentiniń baspasóz qyzmeti mamany Kenje Qonysbaı.
Jol-kólik oqıǵasy saldarynan «VAZ 2115» avtokóligindegi 12 jasar jetkinshektiń jaraqat alǵany belgili boldy.
Sonymen qatar taǵy bir jolaýshy medıtsınalyq kómekke júgindi.
