Qostanaıda polıtsııa kóligi soqqan mashınadaǵy bala kóz jumdy
QOSTANAI. QazAqparat – Qostanaı oblysynda polıtsııanyń patrýldik avtokóligi «VAZ 2115» markaly kólikpen soqtyǵysty, dep habarlaıdy QazAqparat.
Aqparatty oblystyq polıtsııa departamentiniń baspasóz qyzmeti rastady. Oqıǵa búgin saǵat 16:00-de Qostanaı-Rýdnyı avtojolynyń 10-shaqyrymynda bolǵan.
«Polıtsııa patrýliniń avtokóligi «VAZ 2115» kóligine soqtyǵysty. 4 jasar bala oqıǵa ornynda qaza boldy. Jedel-tergeý toby oqıǵa ornyn tekserdi. Qyzmettik avtopatrýldiń osy joldyń 17-shaqyrymynda bolǵan jol apatyna bara jatqany anyqtaldy. Birer saǵat buryn taǵy bir «VAZ 2115» kóliginiń 26 jastaǵy júrgizýshisi rólge ıe bola almaı, joldan shyǵyp ketken bolatyn. Saldarynan eki adam kóz jumdy. Bul derek boıynsha QR QK 345-babymen is qozǵaldy», - deıdi polıtsııanyń baspasóz qyzmeti mamany Kenje Qonysbaı.
Qazir jol-kólik oqıǵasy boıynsha qyzmettik tekserý bastaldy. Patrýl kóligi jol ústinde dabyl belgisin qosyp júrgen.
Foto: alau.kz
