Qostanaıda polıtsııa dárigerdiń ólimine qatysty istiń mán-jaıyn aıtyp berdi
QOSTANAI. QazAqparat - Qostanaı oblystyq ІІD oblystyq psıhonevrologııalyq dıspanserdiń bas dárigeri jáne sot-psıhıatrııalyq saraptama tóraıymy bolǵan Rashıda Sandybaevany óltirýdiń qalaı ashylǵany jáne tergeý barysy týraly aıtyp berdi, dep habarlaıdy «QazAqparat» HAA tilshisi.
ІІD krımınaldy polıtsııa basqarmasynyń basshysy Meıram Bazarbaev dárigerdi óltirýge qatysty barlyq kúdiktilerdiń ustalǵanyn málimdedi.
«17 sáýir kúni Qostanaı qalasynda qylmysqa qatysty sońǵy kúdikti ustaldy, - dedi M.Bazarbaev. - Ózge úsheýi buryn anyqtaldy. Olardyń biri - psıhonevrologııalyq dıspanserdiń bólim basshysy Záýresh Izaldına».
Buǵan deıin habarlanǵandaı, qylmys 20 aqpanda Qostanaı qalasynda boldy. Rashıda Sándibaeva óz páterinde ondaǵan jerinen pyshaqtalyp qaza tapty. Polıtsııa qyzmetkerleri QR QK 99-baby, 2-bóligi («Adam óltirý») boıynsha sotqa deıingi deıingi tergeý jumystaryn júrgizýde. Іs boıynsha sot saraptamalary taǵaıyndaldy.
«Jedel-tergeý sharalaryn júrgizý barysynda Sándibaevanyń týystary men jaqyndarynan jaýap alyndy. Olar sońǵy ýaqytta R.Sándibaevanyń óz páterinde jumys istegenin, qujattardy úıge alyp ketkenin habarlady, - dedi tergeý basqarmasynyń basshysy M.Bazarbaev. - Odan keıin polıtsııa qyzmetkerleri Sándibaevanyń páterine tekserý júrgizip, oblystyq psıhıatrııalyq aýrýhanada em qabyldaǵan birneshe naýqastyń syrqatnamasyn tárkiledi. Bul derekterdi zerdeleı kele, qujattardyń biri oblystyq psıhıatrııalyq aýrýhanada em qabyldaǵan naýqasqa tıesili ekeni anyqtaldy. Ol eki qylmys úshin ustalyp, tergeý oqshaýlaǵyshynda bolǵan. Tergeý kezinde ol dıspanserdegi bólim basshysy Izaldınanyń qylmysqa qatysy bolýy múmkin ekenin aıtty, sebebi eki áıel arasynda qaıshylyqtar jıi bolyp turǵan».
Polıtsııa qyzmetkerleri kúdikti Izaldınaǵa qatysty jedel sharalar júrgizip, onyń Rýslan Gafarovpen tanys ekenin bildi. Keıinirek, Gafarovtyń tergeýdiń kúmánin týdyrǵan taǵy úsh adam turǵan PIK shaǵynaýdanynda ornalasqan jaldamaly páterge jıi barǵany anyqtaldy.
«Sándibaevanyń óliminen keıin jedel qyzmet onyń páteri janyndaǵy dúkenniń beınejazbasyn aldy, - dep baıandady M.Bazarbaev. - Osy vıdeony qaraý kezinde Gafarov barǵan adamdarǵa uqsas eki kúdikti anyqtaldy. Olar qylmys jasalǵan soń dereý Qostanaı aýmaǵynan shyǵyp, Qaraǵandy oblysyndaǵy Shahtınsk qalasyna ketken. Sol ýaqytta polıtsııa olardyń Qostanaı aýmaǵyndaǵy eki urlyqqa qatysy baryn bildi. Olardy Shahtınsk qalasynda ustap, Qostanaı qalasyna jetkizdi».
Kóp uzamaı kúdiktiler bultartpas dálelderge baılanysty dáriger Sándibaevany óltirý faktisi boıynsha moıyndaý týraly túsinik berdi.
«Alaıda ol ýaqytta Gafarovtyń qylmysqa qatysy týraly tikeleı aqparat bolǵan joq, - deıdi Qostanaı ІІD tergeý basqarmasynyń basshysy. - Ol tergeý organdarynan jasyryndy jáne syrttaı tutqyndalyp, izdeý jarııalandy».
Eske sala ketsek, 17 sáýir kúni kúdikti Rýslan Gafarov ustalyp , ýaqytsha ustaý oqshaýlaǵyshyna qamaldy. Osylaısha, atalǵan qylmystyń barlyq qatysýshylary qamaýda otyr.
«Psıhonevrologııalyq dıspanserdiń burynǵy bas dárigerin óltirýge kúdiktiler tyńǵylyqty daıyndalǵan, - dep sanaıdy M.Bazarbaev. - Olar qylmys jasalǵan aýdandaǵy beınekameralardyń qaıda ornalasqanyn, Sándibaevanyń kún tártibin jáne daǵdysyn bilgen. Jalpy alǵanda, bul qylmys aldyn ala muqııat oılastyrylǵan».
