Qostanaıda polıtsııa boıjetkendi kólikpen qaǵyp óltirgen júrgizýshini izdestirip jatyr
QOSTANAI. QazAqparat - Qostanaı oblystyq ІІD-niń jeke quramy boıjetkendi kólikpen qaǵyp ketip, oqıǵa ornynan ketip qalǵan júrgizýshini izdestirip jatyr. Onyń kóliginiń astynda qalǵan 27 jastaǵy jas áıel qaza tapty.
Oqıǵa 7 sáýir kúni túnde Qostanaı qalasynda oryn alǵan, dep habarlaıdy ІІD-niń baspasóz qyzmeti.
Jol apaty saldarynan dene jaraqattaryn alǵan jábirlenýshi aýrýhananyń jansaqtaý bóliminde kóz jumdy.
«Tergeý aldyndaǵy tekserý barysynda jábirlenýshiniń Abaı kóshesindegi jolmen kele jatqany anyqtaldy. Polıtseıler oqıǵa ornynda qara kúreń tústi kóliktiń ushyp ketken syrynyń bólshegin jáne synǵan faranyń bólikterin tapty», - dep naqtylady baspasóz qyzmetinen.
