Qostanaıda polıtseıler kúdiktilerdi ustaý úshin qarý qoldandy
QOSTANAI. QazAqparat - Qostanaı oblysynda patrýldik polıtsııa qyzmetkerleri kúdiktini ustaý kezinde qarý qoldandy. Bul týraly oblystyq polıtsııa departamentiniń bastyǵy Beket Aımaǵambetov aıtty, dep habarlaıdy QazAqparat.
Oqıǵa 28 aqpan kúni bolǵan. Reseı Federatsııasynyń 45 jastaǵy turǵyny Qostanaıǵa kommertsııalyq sharýamen keledi. Ortalyqtaǵy bankterdiń birinen asa kólemdi qarajat somasyn sheshedi. Bankten shyqqan kezde onyń kóligin qara tústi VAZ-21099 avtokóligin mingen kúdiktiler qýa bastaǵan.
«Tasjolǵa shyqqanda olar reseılikti jol-kólik oqıǵasyn jasaýǵa deıin ıtermelegen. Ony jol boıynda toqtatyp, kóligin tartyp alǵan. Jábirlenýshi Qostanaı aýdanyna jetip, bolǵan oqıǵa týraly polıtsııaǵa málimdedi. Osy derek boıynsha Qostanaı oblysy men shekaralas Aqmola jáne Soltústik Qazaqstan oblystarynyń aýmaǵynda «Ustaý» jospary jasaldy», - dedi polıtsııa bastyǵy.
Patrýldik qyzmettiń barlyq ekıpajy tasjoldarda kúsheıtilgen rejımde jumys istedi. Amanqaraǵaı aýyly mańynda ekıpaj urlanǵan jáne kúdiktilerdiń avtokólikterin baıqaǵan.
«Kúdiktiler polıtseılerdiń toqtatý talabyn oryndamaı, qashýǵa oqtaldy. Jábirlenýshiniń avtokóligin mingen kúdikti róldi basqara almaı, jol jıegine túsip ketti. Ekinshi kólik qashýdy jalǵastyra berdi. Áýlıekól aýdanynyń Dúzbaı aýyly mańynda tártip saqshylary qarý qoldanýǵa májbúr boldy. Buǵan qosa kúdikti polıtsııa mashınasyn soqpaq bolǵan», - dedi Beket Aımaǵambetov.
Qazirgi ýaqytta kólikte bolǵan kúdiktilerdiń biri qamaýǵa alyndy. Qalǵan ekeýi izdestirilip jatyr.
