Qostanaıda polıtseıge tapansha kezegen kúdikti ustaldy
QOSTANAI.QazAqparat - Qostanaı qalasynda tártip saqshysyna oq atpaq bolǵan 25 jastaǵy kúdikti qamaýǵa alyndy, dep habarlaıdy «QazAqparat» HAA tilshisi.
Qostanaı qalasy ІІB kezekshi bólimine qala turǵyny habarlasyp, jubaıynan arashalaýdy ótinedi. Otbasylyq urys-keris bolyp jatqan úıge ýchaskelik ınspektorlar men jol-patrýldik polıtsııasynyń qyzmetkerleri jiberiledi.
«Alaıda, mas kúıde bolǵan otaǵasy tártip saqshylaryn úı aýlasyna kirgizbedi. Olardy balaǵattap, sálden soń, qaltasynan gaz tapanshasyn sýyryp polıtseılerdi kózdegen. Tártip saqshylary kásibı is-áreketteriniń arqasynda kúdiktiden qarýdy tartyp ala bildi. Bul fakt boıynsha QR QK 380-baby, 2-bóligimen sotqa deıingi tergeý sharalary bastaldy», - dep habarlady oblystyq ІІD baspasóz qyzmetindegiler.
Eger kúdiktiniń kinási dáleldense, oǵan 2000 AEK (4 mln 458 myń teńge) kóleminde aıyppul salynýy múmkin.
