Qostanaıda patsıenttiń operatsııa kezinde qaıtys bolýyna baılanysty is qozǵaldy

ASTANA. KAZINFORM — Qostanaı oblysynda operatsııa kezinde patsıenttiń qaıtys bolýyna baılanysty qylmystyq is qozǵaldy. Bul týraly Úkimet otyrysynan keıingi brıfıngte densaýlyq saqtaý mınıstri Aqmaral Álnazarova aıtty.

Esterińizge sala ketsek, áleýmettik jelige taraǵan vıdeo málimetterine qaraǵanda, operatsııa barysynda er adam kóz jumǵan.

Kýágerlerdiń aıtýynsha, ota jasaǵan neırohırýrg sol kezde mas bolǵan jáne otadan keıin birden aýrýhanadan ketip qalǵan.

— Farmatsevtıkalyq baqylaý departamenti oqıǵa ornynda jumys istep jatyr. Óńirlik ishki ister departamentinde is qozǵaldy. Tekserý qorytyndysynda tıisti pikir bildiremiz dep oılaımyn. Polıtsııa departamenti tarapynan istiń mán-jaıy aıtylǵan joq. Degenmen, biz óz tarapymyzdan maman berdik, — dedi Aqmaral Álnazarova.

Buǵan deıin Qostanaı oblysy Áýlıekól aýdanynda otbasyna qatysty asa aýyr qylmys jasady degen kúdikpen polıtseıler 51 jastaǵy er adamdy izin sýytpaı ustaǵanyn jazǵan edik.