Qostanaıda páter urylary ustaldy
QOSTANAI. QazAqparat - Qostanaı qalasynda 5 páterdi tonaǵan kúdiktiler ustaldy, dep habarlaıdy QazAqparat.
Osy jyldyń sáýir aıynda Qostanaı qalasynyń polıtsııa basqarmasyna oblys ortalyǵynyń 5 turǵyny júgingen.
«Olar páterlerindegi aqsha qarajaty, turmystyq tehnıka men altyn buıymdarynyń urlanǵany týraly aryzdanǵan. Jalpy shyǵyn 3 mıllıon teńgeni qurady. Urlyq faktileri boıynsha qylmystyq isterdi tergeý barysyn Polıtsııa departamentiniń basshylyǵy baqylaýǵa alǵan», - delingen oblystyq Polıtsııa departamentiniń baspasóz habarlamasynda.
Jedel-izdestirý is-sharalaryn júrgizý barysynda «Soltústik» polıtsııa bóliminiń qyzmetkerleri 37 jáne 38 jastaǵy eki er adamdy ustady. Qazirgi ýaqytta kúdiktiler Rýdnyı qalalyq ІІB ýaqytsha ustaý ızolıatoryna qamaldy. Sotqa deıingi tergeý jalǵasýda.
