Qostanaıda paramen ustalǵan komıtet tóraǵasy 3 jyl 6 aıǵa sottalyp ketti

ASTANA. KAZINFORM — AShM Agroónerkásiptik keshendegi memlekettik ınspektsııa komıtetiniń tóraǵasy para alǵany úshin sottaldy, dep habarlaıdy Sybaılas jemqorlyqqa qarsy is-qımyl agenttiginiń baspasóz qyzmeti.

Zańdylyq pen tártip qaǵıdatyn qamtamasyz etý sheńberinde Sybaılas jemqorlyqqa qarsy qyzmet jemqorlyqtyń, onyń ishinde joǵary laýazymdy adamdar arasynda jolyn kesý boıynsha júıeli jumys júrgizip jatyr.

— Máselen, Qostanaı qalasynyń № 2 sotynyń úkimimen Aýyl sharýashylyǵy mınıstrligi Agroónerkásiptik keshendegi memlekettik ınspektsııa komıtetiniń tóraǵasy D. Ábdikárimov orta qaýipsizdikti túzeý mekemesinde merzimin óteı otyryp, 3 jyl 6 aıǵa bas bostandyǵynan aıyryldy. Ol jeke kompanııalardyń basshysy S. Ospanovtan shegirtkege qarsy pestıtsıdterdi jetkizý jónindegi qyzmetterdi memlekettik satyp alý shartyn jasaǵany úshin 4,4 mln teńge somasynda para aldy dep aıyptaldy. Sot S. Ospanovqa 3 jylǵa bas bostandyǵynan aıyrý jazasyn taǵaıyndady. Sonymen qatar, sottalǵandarǵa memlekettik qyzmette jáne kvazımemlekettik sektor sýbektilerinde qyzmet atqarýǵa ómir boıy tyıym salynady, — delingen agenttik habarlamasynda.

Úkim zańdy kúshine engen joq.

Eske salsaq, budan buryn Antıkor basshysynyń burynǵy orynbasary Maqsat Qojabaevtyń inisi, halyqaralyq izdeýde júrgen Dáýrenbek Qojabaev ustalǵany málim boldy.