Qostanaıda para alý isine qatysty advokat kepilmen bosady
QOSTANAI. QazAqparat - №2 Qostanaı qalalyq soty Qostanaı oblystyq advokattar alqasynyń advokatyna qatysty kepil túrindegi bultartpaý sharasyn qarastyrdy, dep habarlaıdy «QazAqparat» HAA tilshisi Qostanaı oblystyq sotynyń baspasóz qyzmetine silteme jasap.
Jaýapqa tartylǵan advokattyń aty-jóni kórsetilmegen. Onyń tek para berýge deldaldyq jasaǵany atalyp ótilgen. Atalmysh qylmystyq istiń Qostanaı oblystyq memlekettik kirister departamentindegi jemqorlyqqa qatysy bar.
Buryn habarlanǵandaı, MKD ekonomıkalyq tekserý qyzmetiniń jedel qyzmetkeri iri kólemde para alǵany úshin qamaýǵa alynǵan.
«Ústimizdegi jyldyń 9 aqpanynda advokat óziniń klıentine sońǵy jedel-izdestirý is-sharalaryn toqtatyp, ony qylmystyq jaýapkershilikke tartpaý úshin Qostanaı oblystyq MKD ETK qyzmetkerine ol arqyly 5 mln teńge somasyndaǵy aqshalaı qarjy berý kerektigin habarlaǵan, - delingen oblystyq sot baspasóz qyzmetiniń habarlamasynda. - Sonymen qatar, advokat MKD qyzmetkerine para retinde tek 3 mln teńge bermekshi bolǵan, al qalǵan qarjyny ózi jymqyrǵysy kelgen».
Klıent advokat arqyly aqsha berýge kelisip, 2017 jyldyń 13 aqpanynda saǵat 20:00-der shamasynda oǵan 5 mln teńge beredi. Advokat kelesi kúni tańerteń MKD qyzmetkerine 3 mln teńgeni jetkizedi. Advokat óz klıentiniń senimine qııanat jasap, qalǵan 2 mln teńge kólemindegi qarjyny jymqyrady.
Sot úderisi barysynda advokatty qorǵaý úshin kepil túrindegi bultartpaý sharasyn qarastyrý týraly ótinish málimdeldi. QR QK 145-babynyń 3-tarmaǵyna sáıkes, kúdikti M. depozıtke 500 AEK (1 mln 134 myń 500 teńge) kólemindegi kepil somasyn tóledi.
Advokat óz kinásin tolyqtaı moıyndady.
Barlyq jaǵdaıdy eskere otyryp, QR QK 148-babynyń 7-tarmaǵyna sáıkes, sot kúdiktige qatysty kepil túrindegi bultartpaý sharasyn qarastyrdy.
Úkim zańdy kúshine engen joq.
