Qostanaıda para alǵan ákim orynbasary 4,5 mln teńge aıyppul tóleıdi

QOSTANAI. QazAqparat - Qostanaı oblysy Fedorov aýdandyq soty aýdan ákiminiń eks-orynbasaryna qatysty iske qysqartylǵan tártippen núkte qoıdy, dep habarlaıdy QazAqparat.

Oblystyq sottyń málimetinshe, Fedorov aýdany ákiminiń burynǵy orynbasary «J» JShS dırektorynan oryndalǵan jumys aktileri boıynsha ýaqytyly tólem jáne jalpy qamqorlyq jasaǵany úshin 150 myń teńge kóleminde para alǵan.

«Fedorov aýdanynyń is júrgizý prokýrory men sottalýshy arasynda kináni moıyndaý týraly protsessýaldyq kelisim jasaldy. Sot úkimimen S. qylmys jasaǵany úshin kináli dep tanyldy. Oǵan paranyń otyz ese kóp somasy mólsherinde aıyppul salyndy. Sottalýshy memleket tarapyna 4,5 mln teńge aıyppul óteıdi», - dep atap ótti oblystyq sottyń baspasóz qyzmetindegiler.

Sonymen qatar, eks-sheneýnik memlekettik qyzmetten ómir boıyna shettetildi.