Qostanaıda para aldy degen kúdikpen aýrýhananyń bas dárigeri úıqamaqqa alyndy

QOSTANAI. QazAqparat - Qostanaı qalasynyń mamandandyrylǵan tergeý soty iri somada para aldy dep kúdikke ilingen oblystyq onkologııalyq dıspanserdiń bas dárigerine qatysty sanktsııalaý sharasyn qarady, dep habarlaıdy QazAqparat oblystyq sottyń baspasóz qyzmetine silteme jasap.  

Vedomstvoda málim etkendeı, Qostanaı oblystyq onkologııalyq dıspanseriniń bas dárigeri Músilim Naýryzov qazirgi ýaqytta úıqamaqqa alynǵan.

«Qostanaı qalasynyń mamandandyrylǵan tergeý soty «Qostanaı oblystyq onkologııalyq dıspanseri» MKQK bas dárigeri M. Naýryzovty eki aıǵa úıde qamaýda ustaý túrindegi bultartpaý sharasyn sanktsııalaý týraly oblystyq PQQTK QІІB jedel-tergeý tobynyń basshysy K. H. Mıramovtyń ótinishin qanaǵattandyrdy», - delingen oblystyq sottyń baspasóz habarlamasynda.

M. Naýryzov adamdarmen aldyn ala sóz baılasyp, iri kólemde para aldy dep kúdikke ilindi.