Qostanaıda oıynshyq qoımasy órtenip ketti
QOSTANAI. QazAqparat - Qostanaıda ortalyq bazar mańyndaǵy oıynshyq qoımasynan órt shyqty, dep habarlaıdy QazAqparat oblystyq TJD baspasóz qyzmetine silteme jasap.
Oqıǵa búgin oblys ortalyǵynda bolǵan. Oblystyq TJD kezekshi bólimine 3 qabatty saýda dúkeniniń janyp jatqany týraly habar túsken.
«Órt sóndirýshiler oqıǵa ornyna saǵat 14:41-de jetti. Órt ǵımarattyń jertóle qabatyndaǵy oıynshyq saqtaıtyn qoımadan shyqqan. Qutqarýshylar jetkenshe ǵımarat ákimshiligi 116 adamdy qaýipsiz jerge kóshirgen», - deıdi vedomstvonyń baspasóz qyzmetindegiler.
Órt 30 sharshy metr aýmaqty sharpyǵan. Zardap shekkender joq. Shyǵyn kólemi eseptelýde.
