Qostanaıda órtten zardap shekken 13 otbasyǵa kómek kórsetiledi - ákimdik

QOSTANAI. QazAqparat – Qostanaıda órtten zardap shekken otbasylar sany kóbeıe tústi, olarǵa barlyq qajetti kómek kórsetilip jatyr. Bul jaıt qala kólemindegi tótenshe jaǵdaı bolyp esepteledi, dep habarlaıdy «QazAqparat» tilshisi qala ákiminiń baspasóz qyzmetine silteme jasap.

«Qostanaı qalasyndaǵy Naberejnaıa kóshesinde 12 turǵyn úı, sharýashylyq nysandary, 3 jeńil kólik pen 1 júk kóligi órtenip ketti. Bul jaıt qala kólemindegi tótenshe jaǵdaı esebine jatqyzyldy. TJ saldaryn joıý boıynsha qalalyq shtab pen komıssııa otyrystary ótti. Memlekettik organdarǵa zardap shekkenderge jyldam kómek kórsetý jóninde tapsyrmalar berildi»

, - dep habarlady qala ákimdiginen.

Órtengen múliktiń baǵasyn esepteý maqsatynda jedel komıssııa qurylyp, oǵan táýelsiz sarapshylar tartyldy. Komıssııa qorytyndysyn qysqa merzimde shyǵarý mindetteldi.

«Qazirgi málimetter boıynsha 13 otbasy zardap shekti. Olarda 13 kámeletke tolmaǵan bala bar, onyń 7-eýi – oqýshy. Adamdardy ýaqytsha ornalastyrý úshin «Drýjba» saýyqtyrý ortalyǵy daıyndalyp, keshe keshke oǵan 5 adam jaıǵastyryldy. Qajetine qaraı, ıaǵnı qalalyq shtbaqa júginetinder bolsa, taǵy da jiberiledi. Adamdar tamaqpen qamtamasyz etilip jatyr. Alǵashqy kómek retinde ár otbasyna 200 myń teńgeden berildi»

, - dep tolyqtyrdy ákimdik.

Qalalyq eńbekpen qamtý jáne áleýmettik baǵdarlamalar bóliminen zardap shekken otbasylardyń árqaısysyna 70 AEK kóleminde bir rettik járdemaqy bólinedi.

Búgin zardap shekken turǵyndarmen oblys ákiminiń birinshi orynbasary Gaýez Nurmuhambetov, oblys ákiminiń orynbasarlary Vıktor Ionenko jáne Erlan Spanov, sondaı-aq qala ákiminiń orynbasarlary, TJB, JPQ men tıisti memlekettik organdardyń basshylary kezdesti.

TJ saldaryn joıý jónindegi jedel shtab jumysy oblys ákimi Arhımed Muhambetovtyń turaqty baqylaýynda.

Buǵan deıin Qostanaıda kóshe boıyna jaıylǵan órtten keıin 11 otbasy baspanasyz qalǵany habarlanǵan.