Qostanaıda órtten kúıip qalǵan 2 bala sanavıatsııamen elordaǵa jetkizildi
NUR-SULTAN. QazAqparat - Nur-Sultan qalalyq №2 balalar aýrýhanasy Qostanaı oblysynda órtten zardap shekken balalardyń jaı-kúıin baıan etti, dep habarlaıdy QazAqparat tilshisi.
Eske sala ketsek, Qostanaı oblystyq densaýlyq saqtaý basqarmasy búgin Jangeldın aýdanynda turǵyn úı ishinde gaz ballony jarylyp, 4 adam kóz jumǵanyn habarlaǵan bolatyn. Taǵy bes adam ártúrli jaraqat alǵan. Oqıǵa 15 jeltoqsan kúni Torǵaı aýylynda bolǵan. Sońǵy málimet boıynsha Baıqadam kóshesindegi turǵyn úılerdiń birinde gaz ballony jarylǵan.
17 jeltoqsan kúni órtten zardap shekkender sanıtarlyq avıakólik arqyly Nur-Sultan qalasyna jetkizilgen. Sonyń ishinde eki bala elordalyq №2 balalar aýrýhanasyna jatqyzylǵan.
«16 jeltoqsanda balalar Jangeldın ortalyq aýdandyq arýhanasyna shuǵyl jetkizilgen. Olarǵa alǵashqy medıtsınalyq kómek kórsetilgen. Jara óńdelip, aýyrsynýdy basqan, ınfýzııalyq, shokqa qarsy terpııa jasalǵan. Sodan keıin Arqalyq óńirlik aýrýhanasynyń jansaqtaý bólimshesine jatqyzylǵan», - dep habarlaıdy №2 balalar aýrýhanasynan.
Osydan keıin jaǵdaıdyń aýyrlyǵyna baılanysty balalar Nur-Sultan qalasy qoǵamdyq densaýlyq saqtaý basqarmasynyń kelisimi boıynsha sanavıatsııa jelisimen Nur-Sultan qalasynyń №2 kópbeıindi balalar aýrýhanasyna jetkizilgen.
«Zardap shekken bir balanyń jasy 10-da. 17 jeltoqsan tańǵy saǵat 05.00 shamasynda sanavıatsııamen jetkizildi. Jaǵdaıy aýyr. Jansaqtaý bólimshesine jatqyzyldy. Dınamıkalyq baqylaýda. Tolyq kólemde barlyq qajetti medıtsınalyq kómekti alyp jatyr. Ekinshi balanyń jasy 8-de. 18 jeltoqsan tańǵy saǵat 04.00 shamasynda sanavıatsııa jelisimen jetkizildi. Aýyrsynýdyń ortasha dárejesi. Jansaqtaý bólimshesinde dınamıkalyq baqylaýǵa alynǵan. Jaǵdaıy turaqtalǵannan keıin beıindi kúıik bólimshesine aýystyryldy. Onda tolyq kólemde statsıonarlyq kómek alýda», - dep habarlady aýrýhanadan.
