Qostanaıda órtenip jatqan jataqhanadan 2 bala qutqaryldy
QOSTANAI. QazAqparat - Qostanaı qalasynda otbasylyq jataqhana órtendi, dep habarlaıdy QazAqparat.
G.Sátjanova esimdi oqıǵa kýágeriniń sózinshe, órt tún ortasynda shyqqan.
«Úıdiń tómengi qabatynan ystyń ıisi sezildi. Bastapqyda mán bergen joqpyz. Kenet aıqaı-shý bastalyp, turǵyndar órttiń bastalǵany týraly dabyl qaqty», - deıdi kýáger.
Aqparatty oblystyq tótenshe jaǵdaılar departamenti rastady. Oqys oqıǵa 21 tamyz kúni saǵat 00:39 shamasynda bolǵan.
«Qostanaı qalasyndaǵy 5 qabatty otbasylyq jataqhananyń 2-qabatynan órt shyqty. Páterden 2 bala qutqaryldy. Barlyǵy 84 adam qaýipsiz jerge kóshirildi. Onyń ishinde 15 bala bar», - dedi oblystyq TJD baspasóz qyzmetindegiler.
Vedomstvoda málim etilgendeı, órttiń naqty sebepteri áli anyqtalyp jatyr. Bastapqy boljam boıynsha,balalar otty abaısyz qoldanǵan bolýy múmkin.
