Qostanaıda órtenip jatqan úıden 7 adam qutqaryldy
«Búgin saǵat 09.55-te Qostanaı qalasynda bes qabatty turǵyn úıde órt shyqqany týraly habarlama kelip tústi.
5 mınýttan keıin oqıǵa ornyna Qostanaı qalasynyń № 5 órt sóndirý bóliminiń 10 qyzmetkeri men 3 órt sóndirý tehnıkasy jetti. Qutqarýshylar kelgende úıdiń kireberisinen qatty tútin shyǵyp jatty. Tútin páterlerge tez tarala bastady. Adamdardyń tynys alýy qıyndap, ómirlerine qaýip týdy.
Birinshi bolyp tútin aımaǵyna quramynda 3 arnaıy mamany bar gaz-tútinnen qorǵaý qyzmetiniń býyny kirdi. Olar janyp jatqan 30 sharshy metr aýdanda jumys istedi», - deıdi vedomstvonyń baspasóz hatshysy Ýálıhan Dosanov.
Órt sóndirýshiler baspaldaqtar arqyly 12 eresek adamdy jáne 5 balany evakýatsııalady. Sonymen qatar, janyp jatqan úıden 7 adam qutqaryldy, onyń ishinde 3 bala bolǵan.
Órt saǵat 10.27-de tolyǵymen joıyldy.
Mamandar órttiń shyǵý sebebin anyqtaýda. Qostanaı oblysynyń TJD turmystaǵy órt qaýipsizdigi erejelerin saqtaýdy eske salady. Otty paıdalanýda abaı bolyńyzdar, qosylǵan elektr jáne gaz aspaptaryn qaraýsyz qaldyrmańyzdar.
