Qostanaıda órtenip jatqan turǵyn úıden bes bala qutqaryldy

QOSTANAI. QazAqparat- Qostanaı qalasynda turǵyn úı órtenip, birneshe adam qutqaryldy, dep habarlaıdy QazAqparat oblystyq TJD baspasóz qyzmetine silteme jasap.

Oqıǵa 5 aqpan kúni oblys ortalyǵyndaǵy Rabochaıa kóshesinde bolǵan. TJD kezekshi bólimine tórt qabatty turǵyn úıden órt shyqqany habarlandy.

«Órt sóndirýshiler oqıǵa ornyna kelgen sátte birinshi qabattaǵy páter janyp jatqan. Órt shyqqan páterdiń 56 jastaǵy ıesi men onyń eresek uly kórshilerine dabyl qaǵyp úlgergen. Tez taraǵan jalyn kórshi páterlerge taralmaýy úshin gaz-tútinnen qorǵaý qyzmetiniń birinshi toby dereý otty sóndirýge kiristi. Ottegi maskalaryn kıgen ekinshi top qutqarýshylary joǵarǵy qabattarǵa kóterilip, zoraıtqysh qurylǵy arqyly turǵyndarǵa evakýatsııa týraly habarlady. Tútin jan-jaqqa tarala bastaǵandyqtan baspaldaqpen 14 adam syrtqa shyǵaryldy. Órt shyqqan úıden 5 bala jáne múgedek áıeldi qutqarylyp, qaýipsiz aımaqqa kóshirildi», delingen vedomstvo habarlamasynda.

TJD málimetinshe órt tońazytqyshtaǵy elektr symynyń qysqa tuıyqtalýynan shyqqan.