Qostanaıda órtenip jatqan kópqabatty úıden 19 adam qutqaryldy
QOSTANAI. QazAqparat - Qostanaı qalasynda órtengen turǵyn úıden 19 adam qutqaryldy, dep habarlaıdy QazAqparat QR ІІM Tótenshe jaǵdaılar komıtetiniń baspasóz qyzmetine silteme jasap.
Oqys oqıǵa búgin saǵat 17:10-der shamasynda boldy. Tilsiz jaý Qostanaıdaǵy kópqabatty turǵyn úıdiń 5-qabatynan shyqqan. Jalyn 20 sharshy metr aýmaqty sharpyǵan.
«Órt shyqqan 5 qabatty úıden 19 adam oqshaý aýmaqqa kóshirildi. Onyń ishinde 2 bala bar. Aldyn ala boljam boıynsha, tótenshe oqıǵaǵa temeki tuqyly sebep bolǵan. Oqıǵanyń saldarynan 1970 jyly týǵan er adamdy kúıik shalyp, aýrýhanaǵa jetkizildi», - delingen vedomstvonyń baspasóz habarlamasynda.
Aıta keteıik, turǵyn úı órti saǵat 17:52-de tolyqtaı sóndirildi. Oqıǵa ornynda 9 órt sóndirýshi jumys istedi.
