Qostanaıda órtenip ketken aýrýhananyń patsıentteri mektep ǵımaratyna kóshirildi
Keshe Qostanaı oblysynyń Fedorov aýdanynda aýrýhananyń órtengenin habarlaǵan edik.
9 qarasha kúni saǵat 18.28-de Fedorov aýdandyq órtke qarsy qyzmet pýltine aýdandyq aýrýhana ǵımaratynyń shatyry janyp jatqany týraly habarlama kelip tústi.
Fedorov aýylynyń órt sóndirýshileri (3 órt sóndirý tehnıkasy, 24 adam) 4 mınýt ishinde oqıǵa ornyna kelip jetti. Buǵan qosa Qostanaı oblysy TJD bólimsheleriniń kúshi tartyldy.
«Qosymsha sý jetkizý úshin 4 tehnıka, 4 mehanıkalandyrylǵan kótergish jumyldyryldy. Qyzyl jalyn hırýrgııalyq bólimshe men qarqyndy terapııa ústindegi 800 sharshy metr alańdy sharpyp zaqymdady. Órt saǵat 21-34-te aýyzdyqtaldy. Ǵımarattyń ishki qabatyndaǵy jaılarynyń janýyna jol berilgen joq. Qaza bolǵandar men zardap shekkender joq. Aýrýhana jabdyqtary búlingen joq. Órttiń shyǵý sebepterin arnaıy komıssııa anyqtaıdy» delingen vedomstvo habarlamasynda.
Qazirgi ýaqytta aýrýhanany qalpyna keltirý jumystary bastaldy.
Ǵımaratta bolǵan 49 naýqas shuǵyl túrde Fedorov aýylyndaǵy № 1 orta mektebiniń janyndaǵy ınternaty ǵımaratyna kóshirildi.
Shuǵyl kómekke muqtaj 6 adam Qostanaı qalasyna arnaıy kólikpen jiberildi. 5 adam mektep janyndaǵy ınternatqa evakýatsııalandy.
«Qazirgi ýaqytta Fedorov aýyly, Legkodýhov kóshesi, 22 meken-jaıy boıynsha ornalasqan №1 OM mektep janyndaǵy ınternat ǵımaratynda jedel járdem kórsetý pýnkti ashyldy. Tótenshe jaǵdaı týyndap, densaýlyǵyńyz nasharlaǵan jaǵdaıda 103 nemese 34279 telefondaryna qońyraý shalý qajet. Barlyq naýqastar shuǵyl qabyldanyp, qajet bolǵan jaǵdaıda oblysymyzdyń jaqyn ornalasqan medıtsına mekemelerine jiberiledi. KVI, JRVI sımptomdary bar naýqastar úshin úıge shyǵýmen eki mobıldi medıtsınalyq brıgada jumys isteıdi. Bir kún ishinde aýrýhana bólimshelerin: qabyldaý bólimshesin – emhana ǵımaratyna (1 qabat), hırýrgııa jáne qarqyndy terapııa bólimshesin – keshendi bólimshege (2 qabat) keshendi (terapııa, balalar bólimshesi) jáne bosandyrý bólimshesin keshendi bólimshege (1 qabat) kóshirý jumystary júrgiziletin bolady», - dep habarlady oblystyq densaýlyq saqtaý basqarmasynyń baspasóz qyzmeti.
