Qostanaıda órtengen turǵyn úıden 35 adam qutqaryldy
QOSTANAI. QazAqparat - Qostanaı qalasynda kópqabatty úıden órt shyqty, dep habarlaıdy QazAqparat oblystyq TJD baspasóz qyzmetine silteme jasap.
Oqıǵa keshe «Naýryz» shaǵyn aýdanynda bolǵan. Belgili bolǵandaı, turǵyn úıdiń 4-qabatyndaǵy bir bólmeli páterden órt shyqqan.
«Páterdiń balkony janyp, jalyn tóbe jabyndysyna tıgen. Turmystyq zattar kúıip ketken. Órt aýqymy 6 sharshy metrdi qurady. 55 jastaǵy úı ıesi qutqaryldy. Kópqabatty úıden 35 adam qaýipsiz aýmaqqa kóshirildi. Olardyń ishinde eki bala bar», - delingen TJD habarlamasynda.
Departamenttiń málim etýinshe, adamdardy syrtqa shyǵarý úshin arnaıy saty paıdalanylǵan. Órt ornynda 7 qutqarýshy jumys istedi.
