Qostanaıda órtengen saraıdan eki adamnyń máıiti tabyldy

QOSTANAI. QazAqparat – Qostanaı oblysy TJD qyzmetkerleri órtengen saraıdan eki adamnyń máıitin tapty, dep habarlaıdy QazAqparat tilshisi.

Oblystyq TJD baspasóz qyzmetiniń málimetine súıensek, oqıǵa búgin Qostanaı-2 shaǵynaýdanyndaǵy jeke turǵyn úı sektory aýmaǵynda bolǵan.

«13 qarasha kúni saǵat 05-15-te TJD kezekshi pýltine Mostovaıa kóshesiniń boıyndaǵy jeke menshik turǵyn úı aýmaǵynan órt shyqqandyǵy týraly aqparat kelip tústi. Onda sharýashylyq qurylysyna arnalǵan saraı órtengen. Oqıǵa ornyna shuǵyl túrde 12 qutqarýshy jáne 2 órt sóndirý tehıkasy jiberildi. Órt aýmaǵy 25 sharshy metrdi qurady. Ashyq jalyn saǵat 05-44-te tolyǵymen sóndirildi», delingen vedomstvo habarlamasynda.

Órtengen saraı ornynan kúıik shalǵan 2 adamnyń múrdesi tabyldy. Qazirgi ýaqytta olardyń jeke bas málimetteri anyqtalýda.

Úı ıesiniń aıtýynsha, órtengen saraı otyn saqtaý úshin qoldanylǵan. Órttiń shyǵý sebebi belgisiz. Sot-medıtsınalyq saraptamasy taǵaıyndaldy.