Qostanaıda órt sóndirýshilerdiń arnaıy jasaǵy quryldy
QOSTANAI. QazAqparat - Qostanaı oblysy ákimdiginde ótken jıynda órtke qarsy daıyndyq jumystary pysyqtaldy, dep habarlaıdy QazAqparat tilshisi.
Qostanaı oblysynyń Tótenshe jaǵdaılar departamentiniń bastyǵy Talǵat Kákimovtiń aıtýynsha, 2017 jyly oblystyń 33 orman alqaby órtenip, 8 dala órti tirkeldi. 2016 jylmen salystyrǵanda olardyń sany 9% ósken. Jalpy, 535, 084 gektar aýmaqty órt shalǵan.
«Jaqynda oblys aýmaǵynda orman, dala órtterin joıý jáne aldyn alý úshin arnaıy jasaq quryldy. Onyń quramynda 140 adam jáne 29 órt sóndirý tehnıkasy bar. Buǵan qosa 3 órt sóndirý poıyzy: «Qostanaı NORP-4», «Qusmuryn NORP-8», «Tobyl NORP» kez kelgen jaǵdaıda jabdyq tasymaldaýǵa ázir. Qazirgi ýaqytta óńirde órtter men tutanýlardy erte anyqtaýǵa múmkindik beretin ǵaryshtyq monıtorıng júrgizilýde. Soǵan baılanysty «Geosat» JShS-men kelisimshart jasaldy», - deıdi T.Kákimov.
Bıyl órt sóndirý jumystaryna daıyndalý úshin qostanaılyq qutqarýshylarǵa Reseı TJM mamandary kómektesedi. QR jáne RF shekaralyq aýmaqtarynda týyndaǵan tabıǵı órtterdi birigip sóndirý jumystary boıynsha 15-18 mamyr aralyǵynda eki eldiń jedel qutqarý toptarymen komandalyq-shtab oqý-jattyǵýlary josparlanǵan.
Jıynda málim etilgendeı, memlekettik órtke qarsy qyzmet shtaby qurylmaǵan eldi-mekenderdegi dala órtteriniń aldyn alýǵa qalalyq jáne aýdandyq bıýdjetten 5 mln 719 myń teńge qarastyrylǵan. Al orman órtteriniń aldyn alýǵa arnalǵan is-sharalarǵa oblystyq bıýdjetten 206 mln 491 myń teńge bólindi.
